Read Oshindonga-Ombiimbeli Ondjapuki 2008 Psalms 19 Bible Online

Psalms 19 - Oshindonga-Ombiimbeli Ondjapuki 2008 bible

Psalms 19

¹Eyalelo otali holola esimano lyaKalunga; Ewangandjo otali eta puuyelele iilonga ye!

²Esiku kehe otali shi tseyithile esiku tali landula; uusiku kehe otau shi endululile uusiku uukwawo.

³Itaku popiwa nando etumbulo nenge oshitya ko kaku na ewi tali uvika kokutsi;

⁴onkene tuu omahambelelo taga lundu kombanda yevi alihe, nomasimaneko taga uvika sigo okooha dhuuyuni. Etango Kalunga okwe li dhikile egumbo mewangandjo;

⁵ongula kehe otali piti ko lya fa ombushiki a nyanyukwa, ngaashi enyakwa tali ihilile kuudhano.

⁶Otali zi koluha lumwe lweyalelo e tali taakanene kolukwawo. Kaku na sha tashi vulu okuholama uupyu walyo.

⁷Ompango yOmuwa kaku na we; otayi nyashula omuntu. Omalombwelo gOmuwa oge shi kwiinekelwa, taga gandja uunongo kumboka taa u pumbwa.

⁸Iipango yOmuwa oyi li mondjila; naamboka haa vulika kuyo, otaa kala aanelago. Omalombwelo gOmuwa ogu uka notaga uvitha ko omadhiladhilo.

⁹Okusimaneka Omuwa okuwanawa; otaku kala aluhe. Omapangulo gOmuwa ogu uka; kage na okatongo.

¹⁰Ogo omawanawa unene ge vule oshingoli oshiyelele; ogo omatoye ge vule omagadhi goonyushi.

¹¹Ngame, omuntu gwoye, otaga longo ndje oondunge; okuvulika kugo oku na ondjambi.

¹²Kaku na omuntu ta vulu okutseya omapuko ge; Omuwa, hupitha ndje momayono ga holama!

¹³Gamena ndje wo, ndaa yone owina; ino etha, oondjo dhi tone ndje. Nena otandi ka kala nda yela nonda manguluka moondjo.

¹⁴Omuwa, omugameni nomuhupithi gwandje, taamba oohapu nomadhiladhilo gandje!