Read Oshindonga-Ombiimbeli Ondjapuki 2008 Psalms 2 Bible Online

Psalms 2 - Oshindonga-Ombiimbeli Ondjapuki 2008 bible

Psalms 2

¹Omolwashike iigwana ya ngundumana? Aantu mbano otaa kondjitha shike ano?

²Aakwaniilwa yuuyuni oya kulumana, naapangeli oyi imanga kumwe okukondjitha Omuwa nomukwaniilwa omuhogololwa gwe notaa ti:

³“Ileni, tu imangululeni, tu umbe ko ondjoko yawo koothingo dhetu.”

⁴Omuwa ngoka a kala megulu, ote ya yolo note ya nyenkele.

⁵Nena te ya popitha nomagandambadhi nomondjahi ye te ya shoshomeke e ta ti:

⁶“Ongame nde mu gwayeke a ninge omukwaniilwa gwandje kuSion, ondundu yandje ondjapuki.”

⁷Onda hala ndi hokolole shoka Omuwa e shi popi. Oye a tile: “Ongoye omumwandje, okuza nena ndjika ongame ho.

⁸Indila ndje, ngame notandi ku pe iigwana uuthiga, evi alihe notali ningi eliko lyoye.

⁹Oto ke yi pangela noshikaha shoonkondo e to yi tatagula ngiikangwa yeloya.”

¹⁰Pukulukeni, ne aakwaniilwa; londodhweni, ne aapangeli yevi.

¹¹Longeleni Omuwa netilo; kakameni, ne mu nyongame koshipala she,

¹²ondjahi ye opo kaayi mu hwamene, nane e tamu si po ombaadhilila. Aanelago oomboka haa kongo egameno puye.