Read Oshindonga-Ombiimbeli Ondjapuki 2008 Psalms 22 Bible Online

Psalms 22 - Oshindonga-Ombiimbeli Ondjapuki 2008 bible

Psalms 22

¹Kalunga kandje, Kalunga kandje, omolwashike we etha ndje? Moluhepo lwandje onda pula ekwatho, ihe itali holoka.

²Kalunga kandje, otandi uhala noku ku igidha, ihe ito yamukula; muusiku ondi ithana, ihe ite mono evululuko.

³Ihe ngoye Omukwaniilwa omuyapuki, oho simanekwa kuIsrael.

⁴Ookuku oya li ye ku inekele; oye ku itula e to ya hupitha.

⁵Oye ku ithana noya hupu moshiponga; oye ku inekele, yo inaa sithwa ohoni.

⁶Ihe ngame kandi shi we omuntu; ezinyo lyowala, omudhinwa nomushekwa kukehe gumwe!

⁷Ayehe mbo taa mono ndje, otaa yolo ndje; otaa nyonkele ndje e taa pukapuka komitse.

⁸Oyo taa ti: “Wa ti owi inekela Omuwa. Omolwashike nduno itee ku hupitha? Ngele oku ku hole, omolwashike itee ku kwatha?”

⁹Okoonkondo dhoye nde ya muuyuni, sho nda valwa kumeme, naasho nda li okahanona, owa gamene ndje.

¹⁰Onde ku inekele okuza kesiku nda valwa, nowa kala aluhe Kalunga kandje.

¹¹Ino kala kokule nangame! Uudhigu ou li ndje popepi, nokaku na ngo ta kwatha ndje.

¹²Aatondi oyendji ya kunduka ndje ya fa oontsezi; ya kondeka ndje ya fa oontsezi oompwidhi dhomuBaasha.

¹³Oye ekamena ndje omakana ya fa oonime tadhi pumbu nodha hala okutudhagula ndje.

¹⁴Oonkondo dhandje dha kana, ongomeya ga tilwahi pevi. Omasipa gandje agehe oga dhamuka; omutima gwandje ogwa fa eka lya hemunwa.

¹⁵Omuligu gwandje ogwa kukuta kwele, nelaka lyandje lya kakatela kondaathelo. Owa thigile ndje eso montsi yevi.

¹⁶Ongundu yaakolokoshi oya kunduka ndje; ongoshipandi shoombwa taa kondeke ndje; otaa nyankula iikaha noompadhi dhandje.

¹⁷Ngame iipongo ayike. Aatondi yandje otaa sinasina ndje ya tongolola ndje.

¹⁸Omuzalo gwandje otaye gu umbile oshihogololitho noonguwo dhandje otaye dhi itopolele.

¹⁹Omuwa, ino kala ndje kokule! Ila nziya, u hupithe ndje!

²⁰Hupitha ndje, ndaa se kegongamwele; hupitha omwenyo gwandje momakana goombwa ndhi.

²¹Hupitha ndje moonime ndhi; onda hepela mokati koonyati ndhika.

²²Onda hala okuhokololela yakwetu iilonga yoye; onda hala oku ku simaneka megongalo:

²³“Mu panduleni, ne aalongeli yOmuwa! Mu simanekeni, ne oluvalo lwaJakob! Mu tsileni oongolo, ne Aaisraeli!

²⁴Ihe etha oohepele ye iha dhini omaudhigu gawo; iha zi po puyo, ihe oha yamukula, ngele taa pula ekwatho.”

²⁵Megongalo alihe otandi ku pandulile iilonga yoye; mokati kaamboka haye ku simaneke, otandi ku pe omayambo ngoka nde ga uvaneke.

²⁶Oohepele otaa ka lya ya kuta; mboka taa ya kOmuwa, otaye mu simaneke. Naa kale nelago sigo aluhe!

²⁷Iigwana ayihe otayi ka tseya Omuwa. Koombinga adhihe dhuuyuni otaku zi aantu e taye ya kuye; omihoko adhihe otadhi ke mu simaneka.

²⁸Omuwa oye omukwaniilwa nota pangele iigwana.

²⁹Aanenentu ayehe otaa ke mu tsila oongolo; oonakukasa otaye ke mu simaneka.

³⁰Omaluvalo gokomeho otage ke mu longela; epipi tali landula otali ka tseyithilwa Omuwa.

³¹Aantu inaa valwa natango otaa ka lombwelwa: “Omuwa okwa hupitha aantu ye.”