Read Oshindonga-Ombiimbeli Ondjapuki 2008 Psalms 26 Bible Online

Psalms 26 - Oshindonga-Ombiimbeli Ondjapuki 2008 bible

Psalms 26

¹Omuwa, igidhila ndje emangululo, oshoka ohandi longo shoka shu uka nonde ku inekela nomwenyo aguhe.

²Omuwa, konakona ndje, ngu u tale mpo ndi ikwatelela.

³Ohole yoye yaaluhe otayi enditha ndje; uudhiginini woye otau wilike ndje.

⁴Kandi na uukuume naantu yaa fele; kandi na ko nasha naayiningithi.

⁵Ondi tonde uukuume naakolokoshi nohandi gamuka kaadhudhu.

⁶Omuwa, otandi iyogo kiikaha okuholola kutya kandi na oondjo notandi dhingoloka oshiyambelo shoye nesimaneko.

⁷Otandi imbi ehambelelo notandi hokolola iikumithalonga yoye ayihe.

⁸Omuwa, ondi hole egumbo lyoye, ehala mpo pu na esimano lyoye.

⁹Ino hanagulila ndje mumwe naalunde; hupitha ndje momupya gwaadhipagi —

¹⁰aantu mbo haa longo aluhe iihuna naamboka ya thowela iisimpo.

¹¹Ngame kombinga yandje ohandi longo shoka shu uka; sila ndje ohenda ngu u hupitha ndje.

¹²Iiponga oyi li ndje kokule; Omuwa otandi mu hambelele megongalo lyaantu ye.