Read Oshindonga-Ombiimbeli Ondjapuki 2008 Psalms 32 Bible Online

Psalms 32 - Oshindonga-Ombiimbeli Ondjapuki 2008 bible

Psalms 32

¹Aanelago oomboka oondjo dhawo dha dhimwa po, mboka ya kuthilwa po omayono gawo.

²Omunelago omuntu ngoka Omuwa itee mu pe uusama noke na iifundja nando yasha.

³Sho nda li inee hempulula oondjo dhandje, onda li nda pwa po kokulila esiku kehe.

⁴Uusiku nomutenya wa li wa geela ndje, Omuwa; omatha gandje oga li ga kana, ngaashi oshitosi tashi thekuka po kuupyu wopothinge.

⁵Opo ihe onde ku hempululile oondjo dhandje; inandi holeka omayono gandje. Onda tokola oku ku hempululila omapuko gandje, nowa dhimi po oondjo dhandje adhihe.

⁶Aantu yoye mbo ye ku inekela, otaa ku galikana momathimbo guudhigu; oshikungulu nando oshi nenepale, itashi ya gumu.

⁷Ongoye egameno lyandje; owa hupitha ndje momupya. Otandi imbi mokule, sho wa hupitha ndje naasho wa gamene ndje.

⁸Omuwa ota ti: “Otandi ku ulukile ondjila ndjo u na okulandula; otandi ku wilike e tandi ku tonatele.”

⁹Ino kala egoya ngaashi onkambe nenge emulutiya, mbyo hayi endithwa kiitomo nokomiya, opo yi ngodhupale.

¹⁰Aadhudhu otaa ka lila, ihe mbo haa inekele Omuwa, ote ya gamene omolwesilohenda lye.

¹¹Ne aayuuki, nyanyukweni ne mu imbe ekandanga omolwiilonga yOmuwa. Ne mbo hamu vulika kuye, tanteni.