Read Oshindonga-Ombiimbeli Ondjapuki 2008 Psalms 33 Bible Online

Psalms 33 - Oshindonga-Ombiimbeli Ondjapuki 2008 bible

Psalms 33

¹Aayuuki amuhe, ligoleleni iilonga yOmuwa; mu hambeleleni, amuhe mbo hamu vulika kuye.

²Panduleni Omuwa nuuharpa, mu imbileni nuuhumba wootheta

³Mu imbileni eimbilo epe, hikeni okaharpa nuunkulungu e tamu ligola!

⁴Oohapu dhOmuwa odhoshili niilonga ye ayihe oyi shi kwiinekelwa.

⁵Omuwa oku hole uuyuuki nuunoshili; esilohenda lye olyu udhilila evi alihe.

⁶Omuwa okwa shiti egulu nelombwelo lye, etango, omwedhi noonyothi onohapu yomokana ke.

⁷Okwa gongele omafuta agehe peha limwe; okwa pimpile omilonga dhomuule mompungulo.

⁸Evi alihe nali tile Omuwa! Mu simanekeni, ne aantu amuhe yomuuyuni!

⁹Oye a popi, uuyuni nowa shitwa; ashihe osha holoka po koonkondo dhelombwelo lye.

¹⁰Omuwa ota kateke omalalakano giigwana; ote yi imbi, yaa tsakanithe oompangela dhayo.

¹¹Omadhiladhilo ge otaga piti sigo aluhe; omalalakano ge kage na mpoka taga hulu po.

¹²Oshigwana oshinelago osho shoka shi na Kalunga kasho Omuwa; aanelago aantu mboka Omuwa e yi ihogololele.

¹³Omuwa oku li megulu to ontamene noku wete aantu ayehe.

¹⁴Oku li mombala ye a nyongama, ta tala oonakukala kombanda yevi.

¹⁵Okwa kutha mo omadhiladhilo gawo agehe nokwa tseya ashihe shoka taa ningi.

¹⁶Omukwaniilwa ita sindi molwetangakwiita lye lyokwakola; omukwiita ite shi tompola molwoonkondo dhe.

¹⁷Oonkambe dhuukwiita itadhi eta esindano; omankondo gadho itaga hupitha.

¹⁸Omuwa ota tonatele mbo haa vulika kuye, oomboka haa inekele esilohenda lye

¹⁹Oye te ya hupitha meso; ote ya kaleke nomwenyo methimbo lyondjala.

²⁰Tse otwi inekela Omuwa; oye omugameni nomukwathi gwetu.

²¹Otatu nyanyukwa omolwe; otatu inekele edhina lye eyapuki.

²²Omuwa, esilohenda lyoye nali kale pamwe natse, ngaashi tu na etegameno mungoye.