Read Oshindonga-Ombiimbeli Ondjapuki 2008 Psalms 35 Bible Online

Psalms 35 - Oshindonga-Ombiimbeli Ondjapuki 2008 bible

Psalms 35

¹Omuwa, tamaneka mboka haa tamaneke ndje, ngu u kondjithe mbo haa kondjitha ndje.

²Kutha oshikandekitho negonga lyoye, u hupithe ndje.

³Ganeka omwele nekuya lyoye, u kondjithe mbo haa tidhagana ndje. Tseyithila ndje, ongoye omuhupithi gwandje.

⁴Mbo taa kambadhala okudhipaga ndje, naa sindwe e taa sithwa ohoni! Mbo taa ende ndje mevi, naa shunithwe e taa piyaganekwa!

⁵Naa fe etutu tali yi ombepo, omuyengeli gwOmuwa sho e ya lamba!

⁶Ondjila yawo nayi ninge omilema nomuthenu, omuyengeli gwOmuwa sho te ya thekula po!

⁷Oya tegele ndje omwigo, nando ine yona sha, noya fulile ndje ekelo, ndi gwile mo.

⁸Ihe ehanagulo otali ya akele, manga inaaye li ndhindhilika; otaa iyulitha komwigo ye gu tega e taa gwile meyonuuko!

⁹Ihe ngame otandi nyanyukilwa Omuwa; otandi shambukwa, oshoka okwa hupitha ndje.

¹⁰Ngame ngaashi ndi li ondi na okutya kOmuwa: “Kaku na gumwe e ku fa. Oto gamene oshimbembe miikaha yomunankondo, ohepele meke lyomuthiminiki.”

¹¹Aakolokoshi otaa kondjitha ndje notaa tamanekele ndje omayono ndaa ga shi.

¹²Otaa galulile ndje uuwinayi moluuwanawa, notandi kanitha etegameno.

¹³Ihe sho ya li muuvu, onda si oluhodhi; ondi ikeye iikulya; onda galikana nomutse gwa nyongama,

¹⁴ongo te galikanene kuume kandje nenge mumwameme. Oluhodhi olwa andalaleke ndje mokweenda, ongangoka ta lili oosa dhayina.

¹⁵Ihe sho nda li muudhigu, ayehe oya li menyanyu noya gongalele ndje e taa sheke ndje; aantu ndaa ya shi oya mbondagula ndje noya tsikile okuhepeka ndje.

¹⁶Oyo aantu taa vulu okusheka oshilema, oya tiliganekela ndje omeho guutondwe.

¹⁷Sigo uunake, Omuwa, wa tala ko owala? Yugulula ndje momahomono gawo; hupitha omwenyo gwandje koonime ndhika.

¹⁸Notandi ke ku pandula megongalo lyaantu yoye; otandi ke ku hambelela montaneho yawo ayehe.

¹⁹Ino etha aatondi yandje aafundja, ya nyanyukilwe okusindika kwandje. Ino etha mbo ye tonde ndje pwaa na etompelo, yi imemehele iimpwiyu yandje.

²⁰Ihaa popi nombili; ihe otaa toto iifundja yi ili noyi ili okulundila aaholi yombili.

²¹Oyo taa lundile ndje taa ti: “Sho wa ninga, otwe shi mona!”

²²Ihe ngoye, Omuwa, shika osha ningwa momeho goye. Onkee ano, Omuwa, ino mwena; ino kala ndje kokule!

²³Thikama, Omuwa, u popile ndje; ila, Kalunga kandje, u gamene ndje.

²⁴Omuwa, ongoye omuyuuki, onkee uthila ndje pauyuuki; ino etha aatondi yandje, ya yole ndje.

²⁵Ino ya pitika, ya tye: “E tu zi momeho! Osho twa hala nale!”

²⁶Mbo taa nyanyukilwa uudhigu wandje, naa sindwe e taa piyaganekwa; mbo taa idhiladhilile uulinawa ye vule ndje, naa yolwe e taa si ohoni.

²⁷Ihe mbo ya hala nda mangululwa, naa igidhe aluhe nenyanyu taa ti: “Omuwa oye omunene! Ota halele omuntu gwe elago.”

²⁸Nena otandi ka hokolola uuyuuki woye, otandi ke ku hambelela esiku alihe.