Read Oshindonga-Ombiimbeli Ondjapuki 2008 Psalms 37 Bible Online

Psalms 37 - Oshindonga-Ombiimbeli Ondjapuki 2008 bible

Psalms 37

¹Ino impwiyika molwaakolokoshi; aalongi yuuwinayi ino ya sila efupa.

²Otaa kana po mbala ongomwiidhi tagu kukuta; otaa si po ongiimeno tayi ganya.

³Inekela Omuwa e to longo uuwanawa; kala moshilongo e to mono egameno.

⁴Konga uulinawa pOmuwa, note ku pe shoka wa yuulukwa.

⁵Igandja kOmuwa; mu inekela, oye te ku kwatha.

⁶Oye ta ka adhimitha uuyuuki woye ongetango lyambandamutse.

⁷Idhidhimika e to tege Omuwa, a longe sha; ino impwiyika naambo taa piti nawa nenge mbo taa enditha oompangela dhawo dhuudhudhu.

⁸Ino iyethela moshimpwiyu nenge muugeyi; mbika ayihe otayi fala muupyakadhi.

⁹Mboka haa inekele Omuwa, otaa ka thigulula evi, ihe aakolokoshi otaa ka tidhwa po.

¹⁰Aadhudhu otaa ka kana po mbala; nando u ya konge, ito ya mono.

¹¹Aayifupipiki otaa ka thigulula evi notaa ka mona uulinawa nombili.

¹²Omukolokoshi ota dhiladhilile omuyuuki iiponga note mu tiliganekele omeho guutondwe.

¹³Ihe Omuwa ota yolo aakolokoshi, oshoka oku shi shi kutya otaa ka yonwa po nziya.

¹⁴Aadhudhu otaa hitulula omagonga gawo notaa zula omatati gawo okudhipaga oohepele nomapongo, okutsa mboka haa longo shoka shu uka.

¹⁵Ihe mbaka otaa idhipagitha komagonga gawo yene, nomatati gawo otaga teywa po.

¹⁶Oshishona shoka omuyuuki e shi ilikolele, oshi vule omauyamba gaakolokoshi ayehe.

¹⁷Oshoka Omuwa ota hulitha po oonkondo dhaakolokoshi nota gamene aayuuki.

¹⁸Omuwa ota sile oshimpwiyu mbo haa vulika kuye, nevi otali ka ninga lyawo sigo aluhe.

¹⁹Oyo itaa ka hepa momathimbo omawinayi; otaa ka kala ye na sha gwana methimbo lyondjala.

²⁰Ihe aakolokoshi otaa ka yonuka po; aatondi yOmuwa otaa ka thekuka po ongoongala dhokelundu; otaa ka kana po ya fa olwithi.

²¹Omudhudhu ota li oongunga ye ite dhi galula nando, ihe omuyuuki ke shi omundalapata neliko lye.

²²Aayambekwa kOmuwa otaa ka thigulula evi, ihe mbo ya thingwa kuye, otaa ka halakanithwa po.

²³Omuwa ota wilike omuntu mondjila ndjoka e na okulandula nota gamene mboka e ya hokwa.

²⁴Ngele taa gu, itaa gwiilile, oshoka Omuwa ote ya pendula po.

²⁵Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOmuwa, nenge oyana taa hehela iikulya.

²⁶Omuyuuki ota gandja aluhe nomwenyo omwaanawa nota kamunukile yalwe, noyana otaa lalekwa nuuyamba.

²⁷Gamuka kuuwinayi e to longo uuwanawa, noluvalo lwoye otalu ka kala ko aluhe.

²⁸Oshoka Omuwa oku hole shoka shu uka noihe etha aantu ye aainekelwa. Ote ya gamene sigo aluhe, ihe oluvalo lwaakolokoshi otalu halakanithwa po.

²⁹Aayuuki otaa ka thigulula evi e taa kala mo sigo aluhe.

³⁰Omuyuuki oha tumbula oohapu dhoondunge, nomilungu dhe ihadhi pititha iifundja.

³¹Oha dhiginine ompango yaKalunga ke momutima gwe, oonkatu dhe ihadhi puguma.

³²Omukolokoshi ota langele omuyuuki, a hala e mu dhipage,

³³ihe Omuwa ite ethele omuyuuki miikaha yomutondi gwe, nomoompangu Omuwa ite mu etha, a pewe uusama.

³⁴Inekela Omuwa, ngu u vulike kiipango ye; oye note ku lenge, u lale evi, noto ka mona okuyonuka po kwaakolokoshi.

³⁵Onda tseya omunanyanya omunankondo; okwa taandele koombinga adhihe a fa omusendeli gwaLibanon.

³⁶Konima onda piti po ishewe, ihe ke po we; onde mu kongo, ihe inandi mu mona.

³⁷Undja omuyuuki, ngu u ndhindhilike omunamikalo; omunambili oku na oluvalo olwindji,

³⁸ihe aalunde otaa dhimwa po sheke, noyana otaa yonwa po thilu.

³⁹Omuwa ota hupitha aayuuki note ya gamene momathimbo guudhigu.

⁴⁰Ote ya kwatha e te ya hupitha; ote ya hupitha miikaha yaadhudhu, oshoka opuye haa kongo egameno.