Read Oshindonga-Ombiimbeli Ondjapuki 2008 Psalms 40 Bible Online

Psalms 40 - Oshindonga-Ombiimbeli Ondjapuki 2008 bible

Psalms 40

¹Onda tega neidhidhimiko ekwatho lyOmuwa; okwa pulakene e tu uvu okulila kwandje.

²Okwa hili ndje melambo lyeyonuuko nomembolokela lyeso. Okwa tula ndje puukukutu kemanya nokwa gamene ndje.

³Okwa longo ndje okwiimba eimbilo epe, ondjimbo yokuhambelela Kalunga ketu. Oyendji mbo taye shi mono, otaa uvu ko elondodho notaa tameke okwiinekela Omuwa.

⁴Aanelago oomboka haa inekele Omuwa; mbo ihaa gama kiimenka nenge ya simaneke iikalunga iifundja.

⁵Owe tu ningile iinima oyindji, Omuwa, Kalunga ketu; kaku na gumwe e ku fa! Owe tu dhiladhilile uuwanawa owindji. Ine vula oku u tumbula auhe — owindji unene!

⁶Ino pumbwa omayambo nomagano; ito pula omidhidhindjambo nenge omayambo gokukutha po oondjo. Ihe owa pe ndje omakutsi goku ku pulakena,

⁷onkee nda yamukula: “Ongame nguka; mompango yoye oto holola shoka ndi na okuninga.

⁸Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.”

⁹Omuwa, megongalo lyaantu yoye ayehe otandi uvitha elaka etoye, nkene we tu hupitha. Ou shi shi kutya itandi ka mwena oku shi hokolola.

¹⁰Elaka lyehupitho inandi li ingungunina; onda hokolola aluhe uudhiginini nekwatho lyoye. Megongalo lyaantu yoye ayehe ine vula okumwena; onda ti kutya ou shi kwiinekelwa nou na ohenda.

¹¹Omuwa, onda tseya kutya ito kala inoo sila ndje ohenda. Ote gamenwa kohole nokuudhiginini woye.

¹²Ngame onda kondekwa kuudhigu owindji — owindji unene okutumbula! Onda ningina moondjo noite vulu we okumona ko; odho odhindji unene dhi vule omafufu gandje gokomutse. Ngashingeyi onda tyololoka.

¹³Kalunga, hupitha ndje! Omuwa kwatha ndje mbala!

¹⁴Mbo ya hala okudhipaga ndje naa sindililwe e taa piyaganekwa. Mbo taa nyanyukilwa uudhigu wandje, naa shunithwe e taa sithwa ohoni.

¹⁵Mbo taa yolo ndje, naa gugithwe komupya gwawo.

¹⁶Ayehe mboka taa ya kungoye, naa nyanyukwe e taa ligola. Ayehe mboka ye hole ehupitho lyoye Aluhe naa tye: “Omuwa omunene ngiini!”

¹⁷Omuwa, ngame oshimbembe nohepele, ino dhimbwa ndje. Ongoye omuhupithi gwandje naKalunga kandje — endelela, u kwathe ndje!