Read Oshindonga-Ombiimbeli Ondjapuki 2008 Psalms 41 Bible Online

Psalms 41 - Oshindonga-Ombiimbeli Ondjapuki 2008 bible

Psalms 41

¹Aanelago oomboka ye na oshimpwiyu noohepele; Omuwa ote ya kwatha, uuna ye li muudhigu.

²Omuwa ote ya gamene e te ya shigi kiiponga; ote ya kaleke nawa moshilongo; ite ya ethele miikaha yaatondi yawo.

³Omuwa ote ya kwatha, uuna ye li muuvu note ya galulile uukolele wawo.

⁴Ngame onda ti: “Onda yono kungoye, Omuwa; sila ndje ohenda e to aludha ndje.”

⁵Aatondi yandje otaa popi ndje nayi. Oya hala, ndi se e te dhimbiwa.

⁶Mbo taa talele ndje po, kaye li moshili; otaa totele ndje omahokololo omawinayi notaa yi e taa ga taandelitha akuhe.

⁷Ayehe mbo ye tonde ndje, otaa popi ndje nokunongona, taa fekele ndje uuwinayi.

⁸Otaa ti: “Uuvu we owokusa; momulalo ita zi mo we.”

⁹Nakuume lela ngo ndi inekela, ngo handi pe iikulya, okwa tsa ondumbo nangame.

¹⁰Omuwa, sila ndje ohenda, u pe ndje ishewe uukolele, notandi ya shunithile uuwinayi wawo.

¹¹Itaa ka sinda ndje, nangame otandi ka tseya kutya owa hokwa ndje.

¹²Oto kwatha ndje, oshoka ohandi longo shoka shu uka; oto kaleke ndje aluhe pungoye.

¹³Hambeleleni Omuwa, Kalunga kaIsrael! Mu hambeleleni nena nosigo aluhe! Amen! Amen!