Read Oshindonga-Ombiimbeli Ondjapuki 2008 Psalms 44 Bible Online

Psalms 44 - Oshindonga-Ombiimbeli Ondjapuki 2008 bible

Psalms 44

¹Onomakutsi getu yene twe shi uvu, Kalunga — ootate oye shi tu hokololele. Oya popi iilonga iinene we yi longo pethimbo lyawo opomasiku gonalenale.

²Owa tidha po aapagani nowa langeke aantu yoye mevi ndyoka we li ya pe. Owa geele iigwana yilwe nowa kaleke nawa aantu yoye.

³Aantu yoye inaa kwata evi molwomagonga gawo, inaa sindana koonkondo dhawo yene, ihe okoonkondo nokomatha goye, okeinekelo oku ku inekela, oshoka owa li u ya hole.

⁴Ongoye omukwaniilwa gwandje naKalunga kandje; ongoye to pe aantu yoye esindano,

⁵nokoonkondo dhoye tatu sindi aatondi yetu.

⁶Ngame itandi inekele uutati wandje nenge egonga lyandje, li hupithe ndje;

⁷ihe ongoye we tu hupitha miikaha yaatondi yetu nowa sitha aatondi yetu ohoni.

⁸Otwa hala oku ku simaneka ethimbo kehe notatu ku pandula sigo aluhe.

⁹Ihe ngashingeyi owe tu ekelehi nowe tu etha, tu sindike; ito tidha po we aatondi yetu.

¹⁰Owe tu etha, tu tidhwe kaatondi yetu noyi ihakanene omaliko getu.

¹¹Owe tu etha, tu dhipagwe ongoonzi; owe tu halakanithile muupongekwa.

¹²Owa landitha po aantu yoye kombiliha, ongo to tala kutya kaye na omupondo gwasha.

¹³Aashiinda yetu oya mono shoka we tu ningile notaye tu sheke e taye tu yolo.

¹⁴Owe tu ningi oshiyolwa mokati kiigwana; otaye tu tala nondhino taa pukapuka komitse.

¹⁵Ngame ondi li momupya aluhe; onda gugwa

¹⁶kokuuva omanyenkelo nomasheko gaaniita nangame naambo ye tonde ndje.

¹⁷Ayihe mbika oye tu adha, nonando tse inatu ku dhimbwa nenge tu teye ehangano ndyoka wa hangana natse.

¹⁸Otwa kala aainekelwa yoye; inatu kala inaatu vulika kiipango yoye.

¹⁹Ihe ngoye owe tu ethele mokati kiiyamakuti; owe tu thigi momilema thokothoko.

²⁰Ngele ando otwe ethele okugalikana Kalunga ketu e tatu galikana oshikalunga shontumba,

²¹nena ando owe shi dhimbulula, oshoka omadhiladhilo getu gomonguwi owe ga tseya.

²²Ihe omolwoye tatu dhipagwa ethimbo alihe; tatu ningwa ngaashi oonzi tadhi dhipagwa.

²³Omuwa, penduka! Omolwashike wa kotha? Yeluka! Ino tu ekelahi sigo aluhe!

²⁴Omolwashike to tu holama? Ino dhimbwa okuhepekwa nuudhigu wetu!

²⁵Otwa hatwa pevi; otwa lala montsi twa sindika.

²⁶Ila, u tu kwathe! Tu hupitha omolwesilohenda lyoye!