Read Oshindonga-Ombiimbeli Ondjapuki 2008 Psalms 49 Bible Online

Psalms 49 - Oshindonga-Ombiimbeli Ondjapuki 2008 bible

Psalms 49

¹Kehe gumwe, pulakena! Pulakeneni, ne aantu yomuuyuni auhe,

²aawa naathigona, aayamba noohepele.

³Omadhiladhilo gandje ogomuule; otandi popi oohapu dhoondunge.

⁴Onda gama unene komayeletumbulo notandi ga fatulula mokuhika okahumba.

⁵Momathimbo guudhigu ine tila nando osha, uuna nda kundukwa kaatondi,

⁶kaadhudhu mbo haa inekele uuyamba wawo nohaa inenepekele omaliko gawo ogendji.

⁷Omuntu ita vulu okwiihupitha; ita vulu okufuta Kalunga, e mu kaleke nomwenyo,

⁸oshoka ofuto molwomwenyo gwomuntu onene noonkondo. Shoka te shi futu ando, itashi gwana.

⁹Ofuto ndjoka itayi mu keelele mombila; itayi mu kaleke nomwenyo sigo aluhe.

¹⁰Kehe gumwe okwa tseya kutya naanandunge wo ohaa si; aagoya naathethe wo okombila yu uka. Ayehe mbaka omauyamba gawo otaye ga thigile omaluvalo gawo.

¹¹Oombila dhawo odho omagumbo gawo sigo aluhe; omo moka taa kala aluhe, nonando oya li ye na omayana gawo yene.

¹²Esimano lyomuntu, itali vulu oku mu hupitha moonyala dheso; ota ka sa owala a fa oshinamwenyo.

¹³Koneka sho tashi adha mbo yi iyinekela yo yene, shoka tashi ka tsakaneka mboka ya gwanenwa komaliko.

¹⁴Otaa si omulape ya fa oonzi, neso otali ya landula ngomusita. Omalutu gawo otaga olele mbala muuyuni wokuusi kokule nomagumbo gawo, yo itaa yelekwa naayuuki.

¹⁵Ihe Kalunga ota popile ndje; ota hupitha ndje moonyala dheso.

¹⁶Ino piyaganekwa komuntu ngo ta ningi omuyamba, ngele eliko lye tali indjipala;

¹⁷ita vulu okuya nalyo, uuna ta mana oondjenda; eliko lye itali ke mu thindikila kombila.

¹⁸Omuntu nando oku kale a gwana mokukalamwenyo huno kwongashingeyi nota simanekwa, sho e li nawa,

¹⁹ota ka sa ashike ngaashi oohekulu, oomboka ye li momilema dhaaluhe.

²⁰Esimano lyomuntu itali vulu oku mu hupitha moonyala dheso; ota ka sa ashike a fa oshinamwenyo.