Read Oshindonga-Ombiimbeli Ondjapuki 2008 Psalms 65 Bible Online

Psalms 65 - Oshindonga-Ombiimbeli Ondjapuki 2008 bible

Psalms 65

¹Kalunga, osho opala oku ku hambelela muSion; otatu ku gwanithile omauvaneko getu.

²Eeno, ongoye nguka ho uvu omagalikano. Aantu ayehe otaye ya kungoye omolwoondjo dhawo

³Omayono getu oge tu tono, ihe owe ga dhimi po.

⁴Aanelago oomboka we ya hogolola nowe ya kaleke muuyapuki woye. Otatu ka kuta kuuwanawa womegumbo lyoye, otempeli yoye ondjapuki.

⁵Kalunga omuhupithi gwetu, owe tu yamukula miilonga yoye iikumithi sho we tu hupitha. Aantu yomuuyuni auhe noyokombanda yomafuta otaye ku inekele.

⁶Owa thikameke po oondundu koonkondo dhoye; omatha ogo omuzalo gwoye.

⁷Owa loteke etukuluko lyomafuta nedhengo lyomakuthikuthi; owa mweneke omakolokosho giigwana.

⁸Aakali kombanda yevi otaa kuminwa iinyengandunge yoye. Aantu yokoombinga adhihe dhevi otaye ku hambelele.

⁹Evi oho li sile oshimpwiyu, sho ho li tekele; oho li yambapaleke. Omilonga dhaKalunga odhu udha omeya okupa aantu iilya, oshoka osho we li tulile po.

¹⁰Oto tutike omasilu gevi noto yelekanitha iituntu yalyo. Oto li nengeneke niihomo, niimeno yalyo oto yi yambeke.

¹¹Oto gandja eteyo ewanawa; iinkoti yoye oyu udha uuyamba.

¹²Omalundu oga ziza; oondundu odha nyanyukwa.

¹³Omalundu ogu udha oonzi, nomapya oga ziza iilya; ayihe otayi ligola ya nyanyukwa.