Read Oshindonga-Ombiimbeli Ondjapuki 2008 Psalms 73 Bible Online

Psalms 73 - Oshindonga-Ombiimbeli Ondjapuki 2008 bible

Psalms 73

¹Kalunga oye omwaanawa shili kuIsrael, kumboka ye na oomwenyo dha yela.

²Ihe ngame ando nda kanitha einekelo; okonyala ndaa na we eitaalo,

³oshoka onda li nda sila aainenepeki efupa, sho nda mono uulinawa waakaanakalunga.

⁴Ihaya alukwa; oye na oonkondo nuundjolowele.

⁵Inaa adhika komaudhigu ngaashi aantu yalwe; inaya ala komavu ngaashi yalwe.

⁶Onkee ano uuntsa otau kala wa fa iimona yoompole moothingo dhawo; epiyagano otali ya siikile ngaashi onguwo.

⁷Omitima dhawo otadhi fuluka uuwinayi; omadhiladhilo gawo otaga tungu oompangela dhuukolokoshi.

⁸Otaa yolo notaa sheke yakwawo; oyu udha einenepeko noya hala okuningilila mo yakwawo.

⁹Otaa sheke Kalunga e li megulu; taa tumbula omalombwelo guuntsa kaakali kombanda yevi.

¹⁰Onkee ano aantu otaye ya pulakene e taa itaale kehe shoka taa ti.

¹¹Otaa ti: “Kalunga ite shi tseya; gwokombandambanda ite shi dhimbulula.”

¹²Aakaanakalunga osho naanaa ye li ngaaka; aluhe oye na uupu, nomaliko gawo otaga indjipala.

¹³Itashi kwatha sha nani, sho ndi ikeelele kuuwinayi nonda kala inee yona?

¹⁴Kalunga, esiku alihe owa dhenge ndje nomeehamo; owa geele ndje esiku kehe.

¹⁵Ando onda tumbulile oohapu dha tya ngawo, ando onda ningi shoka inaashi opala okuuvika mokati kaantu yoye.

¹⁶Sho nda kambadhala okudhiladhila oshinima shino, oshe etele ndje uudhigu.

¹⁷Ihe sho nde ya mongulu yaKalunga, nena ondu uvu ko kutya oshike tashi ka ningilwa aakaanakalunga.

¹⁸Oto ke ya enditha pehala tali pundukitha noto ke ya undulila meyonuuko.

¹⁹Mbalambala otaa kana po; otaa kulukile mehanagulo.

²⁰Ngaashi omuntu ta penduthwa kondjodhi, osho taa ka kana po, uuna Omuwa to iholola.

²¹Ano omwenyo gwandje sho gwa li gwa geye, niitiyanathigo sho ya tsu ndje,

²²onda ningi egoya, kandi uvite ko sha, nda li nda fa oshiyamakuti koshipala shoye.

²³Ihe nando ongeyi, ondi li aluhe pungoye; owa kwata ndje koshikaha.

²⁴Otandi wilikwa komaudhikilo goye, nopehulilo oto ka thikitha ndje meadhimo.

²⁵Kaku na we gulwe e ku vulile ndje, megulu nenge kombanda yevi.

²⁶Olutu nomwenyo gwandje nando nayi name, Kalunga oye oonkondo dhandje; oye awike nda pumbwa.

²⁷Mbo ye li kokule nangoye, otaa ka yonuka po; ayehe mbo yaa shi kwiinekelwa, oto ya kombo po.

²⁸Ihe ngame, osho opalela ndje okukala popepi naKalunga. Omuwa Omupangeliawike onde mu ningi egameno lyandje, niilonga ye ayihe otandi ke yi hokolola.