Read Oshindonga-Ombiimbeli Ondjapuki 2008 Psalms 74 Bible Online

Psalms 74 - Oshindonga-Ombiimbeli Ondjapuki 2008 bible

Psalms 74

¹Kalunga, omolwashike we tu ekelehi ngeyi? Oto geele oonzi dhuusita woye sigo aluhe?

²Dhimbulukwa aantu mbo we ya kulile muupika; aantu we ya hupitha, ya ninge yoye. Tala ondundu Sion, ehala lyokukala kwoye.

³Enda momakulukuma ngaka; aatondi oya hanagula po ashihe motempeli.

⁴Aatondi oya dhanene pehala lyoye eyapuki; oya dhike po omapandela gawo.

⁵Oya li ya fa aalumentu taa kwata omakuya e taa keke po okuti.

⁶Oya hanagula po iikwashiti ayihe nomakuya nonoosilwa dhawo.

⁷Oya fike po otempeli yoye noya nyateke ehala mpo ho simanekelwa.

⁸Oya popi ya ti: “Otatu ya kombo po thilu!” Ehala kehe moshilongo lyokusimaneka Kalunga oye li fike po.

⁹Inapu hupa nando efano lyokuholola okukalapo kwaKalunga; inapu hupa omuhunganeki. Kaku na ngoka a tseya kutya otashi kala ngeyi sigo uunake.

¹⁰Kalunga, sigo uunake aatondi taye ku sheke? Otaa ethiwa, ya tumbule owala edhina lyoye?

¹¹Omolwashike itoo tu kwatha? Omolwashike itoo ganeke oshikaha shoye, u ya yone po?

¹²Kalunga, ongoye omukwaniilwa gwetu okuza konale; owa kala omuhupithi gwetu.

¹³Owa topola efuta noonkondo dhoye; owa nyanyula omitse dhiilyani yomomeya.

¹⁴Owa tete ko omitse dhevovo, nolya ningi oondya dhiilikama yomombuga.

¹⁵Owe egulula oothithiya nomilonga dhomevi nowa pwinike omilonga ndhoka hadhi tondoka ethimbo alihe.

¹⁶Owa shiti omutenya nosho wo uusiku; owa tula ko etango nomwedhi.

¹⁷Ongoye wa tende oongamba dhevi; owa tula ko othinge nokufu.

¹⁸Omuwa, tala aatondi yoye, nkene taye ku sheke, aagoya, nkene ya dhini edhina lyoye.

¹⁹Ino gandja oomwenyo dhomapongo kiilikama; ino dhimbwa aantu yoye aatidhaganwa.

²⁰Dhimbulukwa ehangano ndyo wa hangana natse; oshilongo oshu udha omahalutho nepiyagano.

²¹Ino etha aathiminikwa ya sithwe ohoni; oohepele nomapongo nage ku pandule.

²²Kalunga, thikama, u ipopile! Aagoya otaa ku yolo ethimbo alihe.

²³Tala, aatondi otaa tumbula omatilitho nomahalutho ethimbo kehe.