Read Oshindonga-Ombiimbeli Ondjapuki 2008 Psalms 78 Bible Online

Psalms 78 - Oshindonga-Ombiimbeli Ondjapuki 2008 bible

Psalms 78

¹Aantu yandje, pulakeneni omalongo gandje; uvii ko oohapu dhandje.

²Otandi longitha iipopiwamayele; otandi fatulula iiholekwa yonakuziwa.

³Otandi popi iinima twe yi uva notu yi shi; iinima twe yi lombwelwa kootate yonale.

⁴Itatu yi holeke aana yetu; otatu hokololele oluvalo lwokomeho iilonga iinene yOmuwa, oonkondo dhe niikumitha ye.

⁵Omuwa okwa pe Aaisraeli iipango nokwa pe oluvalo lwaJakob omautho. Okwa lombwele ootatekulu omalongo ngoka ye na oku ga longa oyana.

⁶Oluvalo lwokomeho opo lu tseye iipango yOmuwa, naamboka inaa valwa natango, otaa tegelelwa ye ke yi longe oyana.

⁷Osho ngeyi otaa ki inekela Kalunga noitaa ka dhimbwa iilonga ye, ihe otaa ka vulika kiipango ye.

⁸Itaa ka fa nando oohekulu mbo ya kala aapandala yo ihaa vulika. Oya li inaa igameka kuKalunga noinaye mu inekela.

⁹Aalumentu Aaefraim oya li ya homata, aayumbi yomatati ya pyokoka, ihe molugodhi oya sindika.

¹⁰Inaa dhiginina ehangano naKalunga; oya tindi okuvulika kiipango ye.

¹¹Oya dhimbwa shoka e shi ningi, iikumitha mbyoka ya mono te yi longo.

¹²Omuwa okwa longo iikumitha montaneho yoohekulu muEgipiti, melundu lyaZoan

¹³Okwa taula efuta nokwe ya pititha mo; okwa thikameke omeya ngaashi oontuni.

¹⁴Omutenya Omuwa okwe ya wilike noshikogo shomuzile, nuusiku okwe ya minikile nonyeka yuuyelele.

¹⁵Mombuga okwa tatula emanya nokwe ya pe omeya ogendji.

¹⁶Okwe ya egululile oothithiya memanya nokwa pimpile omeya pevi ngaashi gomulonga.

¹⁷Ihe oya tsikile okuyona kuKalunga; mombuga inaa vulika kungoka gwokombandambanda.

¹⁸Oya makele Kalunga owina, sho ye mu pula iikulya.

¹⁹Oya dhini Kalunga, sho ya ti: “Kalunga ota vulu tuu okugandja iikulya mombuga?

²⁰Otwa mona ngaa kutya okwa dhenge emanya, omeya noga pimpuka mo; ihe ota vulu tuu oku tu pa iikulya nota pe tuu aantu ye onyama?”

²¹Omuwa sho u uvu taa popi ngeyi, okwa geye; omulilo gwe ogwa hwamene Jakob nondjahi ye oIsrael,

²²oshoka inaa itaala Kalunga yo inaa inekela kutya oha kwatha.

²³Okwa ithana eyalelo nokwe egulula iiyelo yalyo.

²⁴Okwe ya lokithile omanna; okwe ya pe iikulya yokegulu.

²⁵Oya li iikulya yaayengeli; Omuwa okwe ya pe iikulya ya gwana.

²⁶Okwa pepitha ombepo yokuuzilo, nokoonkondo dhe okwa tukulukitha ombepo yokuumbugantu.

²⁷Okwa tumine aantu ye oondhila dhonyama, odhindji dhi thike pehekevi lyopooha dhefuta.

²⁸Okwe dhi lambelitha moontanda dhawo, nomomudhingoloko gwomatsali gawo.

²⁹Aantu oya li e taa kuta; Kalunga okwe ya pe iipalutha ya gwana.

³⁰Ihe manga inaaya za pokulya, nomanga iikulya ya li natango momakana gawo,

³¹Kalunga okwe ya geele, okwa dhipaga po aanenentu yomuyo nokwa kombo po aalumentu aagundjuka muIsrael.

³²Nando ongeyi, aantu oya tsikile owala okuyona; nando ya mono iikumitha mbyoka Omuwa e yi longo, inaa itaala.

³³Onkee okwa hulitha po omasiku gawo ngaashi omufudho, noomvula dhawo mehaluko.

³⁴Uuna Kalunga e ya dhenge, mbo ya hupu ko ohaye mu kongo; ohaa uluma okuya kuye.

³⁵Ohaa dhimbulukwa kutya Kalunga oye omugameni gwawo, Omunankondoawike oye omukwathi gwawo.

³⁶Oohapu dhawo odha li iifundja yowala; omakana gawo oga popi iilombo.

³⁷Kaya li nande yi inekela Kalunga yo inaa ikolelela mehangano naye.

³⁸Ihe Kalunga okwa kala omunahenda; okwe ya dhimine po omayono gawo ye ine ya yona po. Omathimbo nomathimbo okwa mweneke ondjahi ye ye ine etha yi mu tone.

³⁹Okwa dhimbulukwa kutya oyo aantu yowala; oya fa ombepo tayi pepe noitayi galuka we.

⁴⁰Olungapi inaaya vulika kuye mombuga, nolungapi ye mu nikitha oluhodhi!

⁴¹Omalupita nomalupita oya yeleke Kalunga; oya geyitha Kalunga Omuyapuki gwaIsrael.

⁴²Inaa dhimbulukwa iilonga ye yoonkondo nesiku ndiya, sho e ya hupitha miikaha yaatondi,

⁴³esiku ndiya a holola iilongankondo ye niikumitha muEgipiti, melundu lyaZoan.

⁴⁴Omilonga dhamo okwe dhi shitukitha ombinzi, nAayegipiti inaa vula okunwa omeya gadho.

⁴⁵Okwe ya tumine iipupu yomatopola e tage ya li, nomafuma tage ya hepeke.

⁴⁶Iilya yawo momapya okwe yi likitha po kokambayaya, niimeno yawo koombahu.

⁴⁷Omiviinu dhawo okwe dhi teya po nomvula yoompawe, nomikwiyu dhawo noshikungulu.

⁴⁸Iimuna yawo okwe yi dhipagitha po oompawe, niigunda yiimuna yawo oya akulwa komalwaadhi.

⁴⁹Okwa hwameke omulilo gwondjahi ye mokati kawo: ongeyo, ehanyo nekehuko; mbika oya li ya fa aayengeli yehanagulo.

⁵⁰Ina kankeka ondjahi ye nenge e ya keelele meso, ihe okwe ya dhipaga po nelega.

⁵¹Okwa dhipaga po iisheeli yAayegipiti, aamati aatango yomomatsali gawo.

⁵²Opo ihe okwa kutha mo aantu ye ngaashi omusita gwiimuna; okwe ya kwatele komeho nokwe ya enditha mombuga.

⁵³Moku ya piitha mo inaa mona oshiponga yo inaa tila; ihe aatondi yawo oya sile mefuta.

⁵⁴Okwe ya eta kevi eyapuki, koshilongo shoondundu e shi kwata ko noonkondo dhe.

⁵⁵Okwa tidha mo iigwana mbyo ya li mo; evi lyawo okwe li tendele omazimo gaIsrael nokwe li ya pe li ninge onkalelo yawo.

⁵⁶Ihe oya makele Kalunga gwokombandambanda, inaa vulika kiipango ye.

⁵⁷Oya li aapandala noinaa vulika ya fa oohekulu. Oya li yaa shi kwiinekelwa, ya fa uutati inaau lukilwa nawa.

⁵⁸Oye mu geyitha nokusimaneka iikalunga koondundu; oya pendutha ondjahi ye niimenka yawo.

⁵⁹Kalunga sho e shi mono, okwa geye nokwe ekelehi aantu ye Aaisraeli.

⁶⁰Okwe etha po etsalihangano lye muShilo egumbo lye ndyoka e li dhikile mokati kaantu.

⁶¹Okwa falitha oshikethahangano shoonkondo dhe muupika, nesimano lye miikaha yaatondi.

⁶²Okwa geele aantu ye; okwe ya etha, ya dhipagwe nomagonga.

⁶³Omulilo ogwa fike po aamati aagundjuka; aafuko aakadhona inaa vula okwiimbilwa omaimbilo gohango.

⁶⁴Aayambi yawo oya dhipagwa nomagonga, naaselekadhi yawo inaa vula okulila oosa.

⁶⁵Nena Omuwa okwa penduka ongomuntu a li a kotha, ongaashi ofule a kolwa komaviinu.

⁶⁶Okwa dhenge aatondi ye nokwe ya sitha ohoni.

⁶⁷Ihe okwi iteka oluvalo lwaJosef; ina hokwa ezimo lyaEfraim.

⁶⁸Okwa hogolola ezimo lyaJuda; ondundu Sion okwe yi hokwa.

⁶⁹Okwa tungile ko otempeli ye yi li puule ya fa egulu; ya kola ngaashi evi ndyoka e li shiti konalenale.

⁷⁰Okwa hogolola David omupiya gwe, e mu kutha muusita woonzi.

⁷¹Mokuza muusita woonzi, okwe mu ningi omusita gwaantu ye Aaisraeli.

⁷²David okwe ya litha nuuyuuki nokwa li e na oondunge moku ya wilika.