Read Oshindonga-Ombiimbeli Ondjapuki 2008 Psalms 80 Bible Online

Psalms 80 - Oshindonga-Ombiimbeli Ondjapuki 2008 bible

Psalms 80

¹Omusita gwaIsrael, tu uva; ongoye omuwiliki gwaantu yoye. Ngoye ngu wa kuutumba mokati kaakerubi, adhima!

²Ihololela omazimo gaEfraim, Benjamin naManasse. Holola oonkondo dhoye, ila, u tu hupithe.

³Kalunga, tu tula ishewe omwenyo! Tu sila ohenda, tu kale tu na omwenyo!

⁴Omuwa Kalunga Omunankondoawike, osigo uunake to ekelehi omagalikano gaantu yoye?

⁵Owe ya pe ethimbo edhigu; owe ya pe oshikwiila sholuhodhi noshitenga shomahodhi.

⁶Owe etha tu dhinwe kaashiinda, naatondi yetu ye tu sheke.

⁷Kalunga Omunankondoawike, tu tula ishewe omwenyo! Tu sila ohenda, tu kale tu na omwenyo!

⁸Owa kutha omuviinu muEgipiti; owa tidha mo iigwana yilwe e to gu tsike mo.

⁹Owe gu longekidhile oshimpungu; omidhi odha koko e tadhi taandele.

¹⁰Omuzile gwagwo ogwa siikile oondundu, niitayi yagwo oya kuwike omisendeli ominene.

¹¹Iitayi yagwo oyi ifala sigo okefuta; iitutuma yagwo sigo okomulonga Eufrat.

¹²Omolwashike wa kumuna po enkolokuma lyagwo? Ngashingeyi aapitipo otaa toonona ko omandjembele.

¹³Omamwanka otage gu lyatagula po, niiyamakuti otayi gu li po.

¹⁴Kalunga Omunankondoawike, tala kutse! Tu tala u li megulu; ila, u hupithe aantu yoye.

¹⁵Ila, u hupithe omuviinu ngu wa kunu, omuti ngu omuhaha wa kokitha.

¹⁶Aatondi oye gu keke po e taye gu fike po; ya geela e to ya yono po.

¹⁷Popila e to gamene aantu yoye we ya hogolola, oshigwana we shi ningi oshinankondo.

¹⁸Itatu ku etha we; tu kaleka nomwenyo, notatu ke ku pandula.

¹⁹Omuwa Kalunga Omunankondoawike, tu tula ishewe omwenyo. Tu sila ohenda e to tu hupitha.