Read Oshindonga-Ombiimbeli Ondjapuki 2008 Psalms 88 Bible Online

Psalms 88 - Oshindonga-Ombiimbeli Ondjapuki 2008 bible

Psalms 88

¹Omuwa Kalunga, omuhupithi gwandje, otandi lili esiku kehe, nuusiku wo otandi ya kungoye.

²Uva egalikano lyandje; pulakena, sho tandi ku kugile ekwatho!

³Omaudhigu ogendji oga gwile ndje; ondi li popepi nokusa.

⁴Eso olye eta ndje mo, nokaku na ngo ta kwatha.

⁵Onda yalulilwa mokati kaasi, ongaashi aadhipagwa ya lala momayendo, mbo itaaya dhimbulukiwa we noitaa mono we ekwatho lyoye.

⁶Owu umbile ndje muule wombila, momilema dholumbogo oluleeleka.

⁷Ongeyo yoye oya dhigupalela ndje, oya hwamena ndje ya fa omulilo.

⁸Owe etha ookuume kandje ya thige ndje po; onda ningi oshikungitha kuyo. Onde edhililwa mo noite vulu okuya ontuku.

⁹Omeho gandje oga nama kuudhigu. Omuwa, ohandi ku ithana esiku kehe nohandi ku yeluthile omaako gandje megalikano.

¹⁰Aasi oho ya longele tuu iikumitha? Itaa yumuka ando e taye ku hambelele?

¹¹Esilohenda lyoye ohali tumbulwa tuu mombila, nenge mehala lyehanagulo ohamu popiwa tuu uudhiginini woye?

¹²Iikumithalonga yoye ohayi monika tuu mehala lyomilema, nenge uuwanawa woye otau tseyika tuu moshilongo shaambo ya dhimbiwa?

¹³Omuwa, otandi ku indile ekwatho; ongula kehe otandi ku galikana.

¹⁴Omuwa, omolwashike to ekelehi ndje? Omolwashike to etha ndje?

¹⁵Onda kala muudhigu okuza muugundjuka wandje nonda kala popepi neso. Onda pwa po molwokukala megeelo lyoye.

¹⁶Ongeyo yoye otayi taukile ndje; omaponokelo goye omadhigu otaga nyanyula ndje.

¹⁷Esiku kehe mbika ayihe oya dhingoloka ndje ngaashi efundja tali zi koombinga adhihe.

¹⁸Owa pitika nookuume kandjelela ye ethe ndje; omilema adhike ndi li nadho.