Read Oshindonga-Ombiimbeli Ondjapuki 2008 Psalms 9 Bible Online

Psalms 9 - Oshindonga-Ombiimbeli Ondjapuki 2008 bible

Psalms 9

¹Omuwa, otandi ku hambelele nomwenyo gwandje aguhe; otandi hokolola iikumithalonga ayihe we yi longa.

²Otandi imbi nda nyanyukwa omolwoye. Otandi ku imbile eimbilo, Kalunga Omunankondoawike.

³Ngele to holoka, aatondi yandje otaa shuna lwaanima; otaa ihata po e taa si.

⁴Ongoye omupanguli omuyuuki nomunashili; owu uthile ndje okwaanuusama.

⁵Owa geele aapagani nowa yono po aakolokoshi, noitaa ka dhimbulukiwa we.

⁶Aatondi yetu oya kana po sigo aluhe; owa hanagula po iilando yawo, noya dhimbiwa thilu.

⁷Ihe Omuwa oye omukwaniilwa sigo aluhe; oye e na oshipundi she shokupangulila.

⁸Oye ta pangele uuyuni nuuyuuki; ota pangula iigwana paushili.

⁹Omuwa oye eholameno lyaathiminikwa; oye epopilongulu momathimbo guudhigu.

¹⁰Omuwa, mboka ye ku shi, otaye ku inekele; iho etha nando ogumwe ngoka te ya kungoye.

¹¹Hambeleleni Omuwa, omupangeli muSion! Hokololeleni oshigwana kehe iilonga ye!

¹²Kalunga oha dhimbulukwa mboka taa ehamekwa; iha dhimbwa okulila kwawo noha geele mboka haye ya ningile uuwinayi.

¹³Omuwa, sila ndje ohenda! Tala, nkene aatondi yandje taa hepeke ndje! Omuwa, hupitha ndje meso,

¹⁴opo ndi vule okuthikama komeho gAajerusalem noku ya hokololela ayihe kutya omolwashike tii ku hambelele. Otandi nyanyukwa, oshoka owa hupitha ndje.

¹⁵Aapagani oya fulu elambo e taa gwile mo; oya tege omwigo e tagu ya yulu yo yene.

¹⁶Omuwa okwi iholola momapangulo ge omayuuki; aakolokoshi oyi iyulitha kiilonga yawo.

¹⁷Eso olyo ethikilo lyaakolokoshi ayehe, olyaayehe mboka taa etha Kalunga.

¹⁸Aanaluhepo itaa kala ye ethiwa aluhe; etegameno lyaathiminikwa itali teywa po sigo aluhe.

¹⁹Ila Omuwa, ino etha aantu ya kale mekuni. Gongela aapagani koshipala shoye, u ya pangule.

²⁰Omuwa, ya tilitha; yu ulukila, ya tseye kutya otaa hulu po.