Read Oshindonga-Ombiimbeli Ondjapuki 2008 Psalms 91 Bible Online

Psalms 91 - Oshindonga-Ombiimbeli Ondjapuki 2008 bible

Psalms 91

¹Kehe ngoka ti itula mepopilo lyOmuwa, nakehe ngoka ta kala megameno lyOmunankondoawike,

²ota vulu okutya kuye: “Ongoye omupopili nomugameni gwandje. Ongoye Kalunga kandje, nde ku inekela.”

³Omuwa ota kandula po iiponga ayihe note ku gamene komikithi dhomalega.

⁴Ote ku siikile nomawawa ge; megameno lye kamu na iiponga; oku shi kwiinekelwa, oye eshigo nepopilo lyoye.

⁵Ito pumbwa okutila iiponga yuusiku nenge eponokelo omutenya.

⁶Elega itali ku akele uusiku, nuuvu itau ku kwata omutenya.

⁷Ponto yoye nando napa se eyuvi nokolulyo lwoye omayuvi omulongo, ngoye ito adhika koshiponga.

⁸Oto kala wa tala, aakaanakalunga nkene taa geelwa.

⁹Oshoka Omuwa oye omupopili gwoye; gwokombandambanda owe mu ningi omugameni gwoye.

¹⁰Onkee oshiponga itashi ku adha, nepiyagano itali thiki popepi nondunda yoye.

¹¹Kalunga ote ku tumine aayengeli ye, ye ku gamene; otaye ku shigi shaa mpoka to yi.

¹²Otaye ku papatele momaako gawo, waa pume oompadhi dhoye komamanya.

¹³Oto ka lyata oonime nomayoka, oonime oohahu nomayoka guuzigo.

¹⁴Kalunga ota ti: “Otandi hupitha mboka ye hole ndje notandi gamene mboka ye shi kutya ongame Omuwa.

¹⁵Uuna taa ithana ndje, otandi ya yamukula; uuna ye li muudhigu, ote kala pamwe nayo. Otandi ya hupitha e tii ya simanekitha.

¹⁶Otandi ya pe omwenyo omule notandi ya hupitha.”