Read Oshindonga-Ombiimbeli Ondjapuki 2008 Proverbs 10 Bible Online

Proverbs 10 - Oshindonga-Ombiimbeli Ondjapuki 2008 bible

Proverbs 10

¹Omayeletumbulo gaSalomo: Omumati omunandunge ota nyanyudha he, ihe omulumentu omugoya oye omukundu gwayina.

²Omauyamba ga likolwa muukeenakalunga, ihaga kwatha, ihe uuyuuki ohau hupitha meso.

³Omuwa iha sitha omuyuuki ondjala, ihe uuhalu waakaanakalunga ohe u undulile kokule hwi.

⁴Ngoka ha tonyaleke omaako, oha si oluhepo, ihe iikaha yondjungu ohayi yambapaleke.

⁵Omumati omunandunge oha pungula poshikufuthinge, ihe ngoka ha kotha peteyo, oha sitha ohoni.

⁶Omayambeko oge li komutse gwomuyuuki, ihe okana komukeenakalunga oku udha iikolokosha.

⁷Ondhimbuluko yomuyuuki oyi na eyambeko, ihe edhina lyomukeenakalunga otali kana po.

⁸Ngoka e na oondunge momwenyo, ota taamba iipango, ihe ngoka ta patana, ota gwile moshitenda.

⁹Ngoka te ende pauyuuki, ote ende kee na mbudhi, ihe ngoka ta goyokitha oondjila dhe, ota tseyika.

¹⁰Ngoka ta pepa aantu nomeho, ota tukula uuwehame, naangoka ta pukulula nakuyona, ota tungu ombili.

¹¹Okana komuyuuki oko oluthithiya lwomwenyo, ihe okana komukeenakalunga oku udha iikolokosha.

¹²Uutondwe ohau tukula oontamanana, ihe ohole ohayi siikile omayono agehe.

¹³Komilungu dhomunandunge ohaku zi owino, ihe ondhimbo oyi lile po ombunda yomugoya.

¹⁴Omunandunge oha pungula uunongo, ihe okana komusama oko ekano li li popepi.

¹⁵Eliko lyomuyamba olyo oshilando she sha kola, ihe uuthigona otau mana po oohepele.

¹⁶Shoka omuyuuki ta likola, otashi gandja omwenyo, uuyamba womukeenakalunga otau mu etele egeelo.

¹⁷Ngoka ta taamba omapukululo, oku li mondjila yokomwenyo, ihe ngoka ta dhini omakumagidho, ota puka.

¹⁸Ngoka ha holeke uutondwe, oye omufundja, naangoka ta taandelitha omaluhoko, oye egoya.

¹⁹Mpoka pe na oohapu odhindji, opo pwa kala omayono, ihe ngoka ti ikwata mokupopya, oye omunandunge.

²⁰Elaka lyomuyuuki olyo oshisiliveli sha hogololwa, omutima gwomukeenakalunga kagu na omungunda gwasha.

²¹Omilungu dhomuyuuki otadhi kwatha aantu yu uke kondjila, ihe aagoya otaa si kompumbwe yoondunge.

²²Eyambeko lyOmuwa otali yambapaleke, nuupyakadhi wiilonga itau gwedhele ko sha.

²³Egoya otali nyanyukilwa okulonga uukolokoshi, nomuntu omunandunge ota nyanyukilwa owino.

²⁴Omukeenakalunga ngele a tila, ota adhika kusha, ihe Omuwa ehalo lyaayuuki ote li gwanitha.

²⁵Uuna oshikungulu tashi kodha, omukeenakalunga ongohela a li po, ihe omuyuuki okwa kankamekwa sigo aluhe.

²⁶Omunanyalo komutumi gwe okwa fa omaetika momayego nongolwithi momeho.

²⁷Etilokalunga otali indjipalitha omasiku, ihe omimvo dhaakaanakalunga otadhi fupipikwa.

²⁸Etegameno lyaayuuki olyo enyanyu, ihe einekelo lyaakaanakalunga otali kana po.

²⁹Ondjila yOmuwa oyo epopilo lyomuyuuki, ihe kaakolokoshi oyo ekano lyowala.

³⁰Omuyuuki iha tenguka sigo aluhe, ihe omukeenakalunga ita kala mo moshilongo.

³¹Okana komuyuuki ohaka popi owino, ihe elaka lyiifundja otali dhimwa po.

³²Omilungu dhomuyuuki odhi shi uuwanawa, ihe okana komukeenakalunga oko iifundja yo yeneyene.