Read Oshindonga-Ombiimbeli Ondjapuki 2008 Proverbs 12 Bible Online

Proverbs 12 - Oshindonga-Ombiimbeli Ondjapuki 2008 bible

Proverbs 12

¹Nakuhokwa epangelo oku hole uunongo, ihe omugoya oha tondo omanyenyetelo.

²Omwaanawa ota hokiwa kOmuwa, ihe Omuwa ota pangula omunamakoto.

³Kaku na omuntu ti ikolekitha uukolokoshi, ihe omudhi gwaayuuki itagu tenguka.

⁴Omukiintu omunamikalo oye oshishani shomulumentu gwe, ihe ngoka ta sitha ohoni, okwa fa ontuko momasipa ge.

⁵Omadhiladhilo gaayuuki ogu uka, oondunge dhaakanakalunga odho omakoto.

⁶Oohapu dhaakanakalunga ohadhi langele ombinzi, ihe okana kaayuuki ohake ya hupitha.

⁷Aakaanakalunga otaa ka hatwa po noitaa kala po we, ihe egumbo lyaayuuki otali kala po.

⁸Omulumentu oha simanekwa shi thike powino ye, ihe omugoyoki gwokomutima oha dhinwa.

⁹Nakwiifupipika e na iipalutha, oku vule ngoka i inenepeka ye omusindjala.

¹⁰Omuyuuki oha sile iimuna ye oshimpwiyu, ihe omwenyo gwomukeenakalunga omukukutu.

¹¹Ngoka ta longo epya lye, oku na iikulya ya ha, ihe oongoka ti ipyakidhile niinima yowala, ke na oondunge.

¹²Aakaanakalunga ohaa lalakanene eliko lya goyoka, ihe omuyuuki ohi imi iiyimati.

¹³Omugoyoki ota yulwa koohapu dhe mwene, ihe omuyuuki ota kwatunuka muudhigu.

¹⁴Omuntu omuyuuki ota kutithwa nuuwanawa tau zi miiyimati yokana ke, niilonga yiikaha ye tayi mu galukile.

¹⁵Ondjila yomusama oyu uka momeho ge mwene, ihe omunandunge ota pulakene omayele.

¹⁶Omusama oha holola ondjahi ye mbala, ihe omunandunge oha siikile oombedhi.

¹⁷Omupopi gwoshili oha popi shoka shu uka, ihe ehokololo lyiifundja ohali kotokele.

¹⁸Aanamalaka omadhigu otayu ulula ngegongamwele, ihe elaka lyaanawino olyo ealudho.

¹⁹Omilungu dhoshili otadhi kala dha kola sigo aluhe, ihe elaka lyiifundja olyokathimbo.

²⁰Omakoto oge li momwenyo gwaangoka ta dhiladhila uuwinayi, ihe oomboka taa tungu ombili, oye na enyanyu.

²¹Kape na oshiponga tashi adha omuyuuki, ihe aakaanakalunga oyu udha omupya.

²²Omilungu dhiifundja odho iihuna koshipala shOmuwa, ihe ye okwa hokwa mboka haye ende muudhiginini.

²³Omunawino oha holeke ontseyo ye, ihe omutima gwomusama ohagu kungu uugoya.

²⁴Iikaha yaanandjungu otayi ka pangela, ihe eshelelelo otali fala miilonga yuupika.

²⁵Oshimpwiyu shomomutima gwomuntu otashi mu thindile pohi, ihe oohapu dhuukuume ohadhi gu nyanyudha.

²⁶Omuyuuki ota kwatele mukwawo komeho, ihe ondjila yaakaanakalunga otayi ya kanitha.

²⁷Oongoka ta shelelelwa, ita yaha oshiyamakuti she, ihe ondjungu yomuntu oyo eliko lye.

²⁸Omwenyo ogwa kala mondjila yuuyuuki, nokweenda nondjila ndjoka kaku na eso.