Read Oshindonga-Ombiimbeli Ondjapuki 2008 Proverbs 15 Bible Online

Proverbs 15 - Oshindonga-Ombiimbeli Ondjapuki 2008 bible

Proverbs 15

¹Eyamukulo etalala otali loteke ondjahi, ihe elaka lyoshihanyeko otali tukula ongeyo.

²Elaka lyomunawino ohali popi uunongo, ihe okana kegoya ohaka yagumuka uugoya.

³Omeho gOmuwa oga tala akuhe, ohaga tongolola aawinayi naawanawa.

⁴Elaka etalala olyo omuti gwomwenyo, ihe elaka lyomakoto ohali tolokana omwenyo.

⁵Egoya ohali dhini omaputudho gahe, ihe ngoka ta pulakene omapukululo, ota ningi omunawino.

⁶Megumbo lyomuyuuki omu na uuyamba owindji, ihe omaliko gomukeenakalunga otaga yonuka.

⁷Omilungu dhomunandunge ohadhi kunu uunongo, ihe omutima gwomusama inagu uka.

⁸Omayambo gaakaanakalunga ogo iihuna koshipala shOmuwa, ihe egalikano lyaayuuki ote li hokwa.

⁹Oondjenda dhomukeenakalunga odho iihuna koshipala shOmuwa, ihe ngoka ta lalakanene uuyuuki, oye e holike kOmuwa.

¹⁰Ngoka ta zi mondjila, ota adhika komageelo omadhigu; ngoka ta tondo omapukululo, ota ka sa.

¹¹Oshaasi noheli oyi igalala koshipala shOmuwa, unene tuu oomwenyo dhaana yaantu!

¹²Omusheki ke hole okupukululwa; kaanawino ita yi ko.

¹³Omutima gwa tundulukwa ohagu nyanyudha oshipala, ihe uudhigu womomutima ohau nikitha omwenyo uuthigwa.

¹⁴Omutima gwomunandunge ohagu kongo uunongo, ihe okana kwomusama okwa nika uugoya.

¹⁵Omasiku gomuhepekwa aluhe omawinayi, ihe omwenyo omunyanyukwi aluhe ogu li moshituthi.

¹⁶U na okashona koye ngoye to tila Omuwa oshi vule uuyamba pamwe nuupyakadhi wawo.

¹⁷Okulya ekaka lyomboga ko ku na ohole oku vule okulya ontselela yondumetana yo ondoka ko ku na uutondwe.

¹⁸Omulumentu omugeyentu oha tukula oontamanana, ihe omwiidhidhimiki oha lotitha oonkalankongo.

¹⁹Epola lyomunanyalo olya fa enkolo lyomano, ihe ondjila yaayuuki oya yelekana.

²⁰Omumati omunawino oha nyanyudha he, ihe omuntu omugoya oha dhini yina.

²¹Uugoya owo enyanyu lyomukeenandunge, ihe omunandunge ohe ende u ukilila.

²²Omadhiladhilo inaaga kundathanwa nawa otaga ponyo, ihe otaga tompola sha mpoka pe na aagandjindunge oyendji.

²³Okeyamukulo lyu uka lyomokana ke omuntu ta nyanyukwa, nohapu oyo opala ngiini pethimbo lyu uka!

²⁴Ondjila yomwenyo otayi londitha omunandunge pombanda, opo a yande okukulukila muusi.

²⁵Omuwa ota yono po egumbo lyomunuuntsa, ihe ongamba yomuselekadhi ote yi tende nawa.

²⁶Iineya yaawinayi oyo iihuna koshipala shOmuwa, ihe oohapu dhuukuume odho oondjelele.

²⁷Ngoka ti ilikolele eliko nomakoto, ota teya po egumbo lye, ihe ngoka ta tondo oombumbo, ota kala e na omwenyo.

²⁸Omwenyo gwomuyuuki ohagu ipyakidhile neyamukulo, ihe okana kaakaanakalunga ohaka fulukitha uudhudhu.

²⁹Omuwa oku li kokule naakaanakalunga, ihe egalikano lyaayuuki ote li uvu.

³⁰Omeho haga adhima otaga nyanyudha, noonkundana oombwanawa otadhi ondokitha omasipa.

³¹Okutsi hoka taku pulakene omapukululo gokomwenyo, otaku kala mokati kaanandunge.

³²Ngoka te ekelehi omagando, ota dhini okukalamwenyo kwe, ihe ngoka ta pulakene omapukululo, ota ningi omunandunge.

³³Etilo okutila Omuwa olyo etekulo lyuunongo, neifupipiko otali tetekele esimano.