Read Oshindonga-Ombiimbeli Ondjapuki 2008 Proverbs 17 Bible Online

Proverbs 17 - Oshindonga-Ombiimbeli Ondjapuki 2008 bible

Proverbs 17

¹Oshithima shomukaga pamwe nombili oshi vule egumbo lyu udha onyama yoontselela pamwe noontamanana.

²Omupiya omunandunge ota pangele omuvalwa omupwidhi, nomokati kaamwayina ota topola uuthiga.

³Ontelekelo oyoshisiliveli neziko olyoshingoli, ihe Omuwa oha konakona oomwenyo.

⁴Omukolokoshi oha pulakene omilungu dhomukotokeli, omufundja oha pulakene elaka lyaamboka taa hunu.

⁵Ngoka ta sheke ohepele, ota sitha Omushiti gwe ohoni; ngoka ta nyanyukilwa oshiponga shamukwawo, ita kala inaa geelwa.

⁶Aatekulu oyo oshishani shaakulupe, nokaanona, he oye esimano lyawo.

⁷Oohapu dhoshikuluntu ihadhi opalele egoya, noohapu dhiifundja ihadhi opalele aawa!

⁸Ombumbo oyo okawe momeho gaangoka te yi gandja; akuhe hoka ta yi, ita patekene.

⁹Oongoka ta dhimi po eyono, ohole ta kongo, ihe ngoka ta lafulula iinima, ota halakanitha ookuume.

¹⁰Epukululo otali taambwa komunandunge, shi vule okudhenga egoya lwethele.

¹¹Omuntu gwekuni ota kongo iiponga, ihe omumbala omukeenahenda ote mu tuminwa.

¹²Okutsakaneka emwanka lya yugwa uumwankona walyo oku vule okutsakaneka egoya muulayi walyo.

¹³Ngoka ta galulile uuwanawa uuwinayi, uuwinayi itau ka gamuka egumbo lye.

¹⁴Okutameka ondokosho okwa fa okupanuna omeya; onkee ano loteka oontamanana, manga inaadhi tukuka.

¹⁵Ngoka ta gamene omunandjo naangoka ta pangula omukeenandjo, ayehe yaali oyo iihuna koshipala shOmuwa.

¹⁶Omolwashike ano iimaliwa yi li miikaha yomusama, ye kee na owino yokwiikongela oondunge?

¹⁷Kuume oku na ohole aluhe, nomumwayina okwa valwa, opo a kwathe moluhepo.

¹⁸Ke na oondunge ngoka ti itula ombambyona yoongunga dhamukwawo noku shi koleka neminiko.

¹⁹Nakuhola oontamanana oku hole omayono, naangoka ti inenepeke, oti ikongele ehanagulo.

²⁰Omunamutima gwa puka ita mono uuwanawa, naangoka e na elaka lyiifundja, ota gwile moshiponga.

²¹Ngoka ta vala egoya, otali mu etele uupyakadhi, nahe yegoya ita ka nyanyukwa.

²²Omutima gwa nyanyukwa otagu eta uundjangandjele, ihe omwenyo gwa nyanyagulwa otagu thipula omasipa.

²³Omukeenakalunga ota taamba ombumbo ndjoka tayi gandjwa ofuthi, opo a goyokithe uuyuuki.

²⁴Omunandunge oha dhimbululwa miilonga, ihe omeho gegoya oge li kooha dhuuyuni.

²⁵Omumati omugoya oye omukundu kuhe, nomalwa omalulululu gaangoka e mu vala.

²⁶Inashi opala, omukeenandjo ngele ota futithwa; noomvalekele odha sheshwa okudhengwa.

²⁷Ngoka ti ikwata mokupopya, oye omunongo, naangoka ti idhidhimike momwenyo gwe, oye omunandunge.

²⁸Egoya ngele olya mwena, otaku tiwa omunandunge; ngele ota mutike omilungu dhe, omunamayele.