Read Oshindonga-Ombiimbeli Ondjapuki 2008 Proverbs 19 Bible Online

Proverbs 19 - Oshindonga-Ombiimbeli Ondjapuki 2008 bible

Proverbs 19

¹Ohepele ndjoka hayi ende moshili, oyi vule ngoka e na omulungu pamwe nuugoya.

²Uulaadhi waa na ontseyo inau opala, naangoka te endelele ota lyata pombambo.

³Uugoya womuntu otau oleke ondjila ye, ihe omutima gwe ogwa tsa ondumbo nOmuwa.

⁴Uuyamba otau hilile omuntu ookuume, ihe ohepele otayi thigwa po kookuume kayo.

⁵Onzapo yiifundja itayi ethwa inaayi geelwa, naangoka ta taandelitha iilombo ita ka hunuka.

⁶Oyendji ohaa ikumbu aanenentu, nomulumentu gwoongoga oku na ookuume oyendji.

⁷Aamwayina yohepele ohaye yi sasana ayehe, ngele ookuume kayo, ongiini? Okupopya kwayo itaku kwatha sha.

⁸Ngoka ta likola oondunge, oku hole omwenyo gwe mwene; ngoka ta dhiginine omayele, ota kala nawa.

⁹Onzapo yiifundja itayi kala inaayi geelwa, naangoka ta taandelitha iilombo, ota hulu po.

¹⁰Eloolo olya sheshwa omugoya, omupiya omushuushuka ota vulu ngiini okulela aawa!

¹¹Oondunge dhomuntu otadhi mu ningi omunamutimahenda, nosho esimano kuye okudhima po eyono.

¹²Ondjahi yomukwaniilwa oya fa onime ongundjuka tayi pumbu, ihe ohokwe ye oya fa omume komwiidhi.

¹³Omumati omugoya oye oshiponga shahe, noondjuma dhomukulukadhi odho ontongo tayi ziya.

¹⁴Egumbo neliko olyo uuthiga wootatekulu, ihe omukiintu omunamayele ota zi kOmuwa.

¹⁵Onyalo otayi kotheke omuntu oomposi dhombonyo, nomunyenge ota si ondjala.

¹⁶Nakudhiginina iipango ota gamene omwenyo gwe; ngoka itaa tonatele oondjila dhe, ota si.

¹⁷Ngoka ta sile ohepele ohenda, ota pungula kOmuwa, Omuwa ote ke mu futila iilonga ye iiwanawa.

¹⁸Putudha omumwoye, uuna ku na etegameno, ihe kotoka, waaye mu dhipage.

¹⁹Omuhahu na geelwe; ngele to kambadhala oku mu kwatha, oto shi geyeke.

²⁰Pulakena omayele, taamba eputudho, opo u kale omunandunge komeho.

²¹Momwenyo gwe oha dhiladhila oshindji, ihe omayele gOmuwa otaga kalelele.

²²Eliko lyomuntu olyo olukeno lwe, oshipu okuninga ohepele shi vule okukala omufundja.

²³Etilo okutila Omuwa otali fala momwenyo: ekuta otali kala nomuntu uusiku noita adhika koshiponga.

²⁴Omunanyalo ota tula oshikaha she metiti e ta nyengwa oku shi fala kokana.

²⁵Nge to dhenge omusheki, nena omuntu gwanathangwa ota kotoka, ihe nge to dhenge omunandunge, nena ota likola omayele.

²⁶Ngoka ta hepeke he nokutidha po yina, oye omumati ngoka te eta ohoni nondhino.

²⁷Mumwandje, ngele oto etha okupulakena omaputudho, nena wa puka ko koohapu dhowino.

²⁸Onzapo yaa na oshilonga, otayi gandja uusama komautho, nokana komukeenakalunga taka nina po uuwinayi.

²⁹Egeelo olya longekidhilwa aasheki nomadhengo eputudho lyomagoya.