Read Oshindonga-Ombiimbeli Ondjapuki 2008 Proverbs 22 Bible Online

Proverbs 22 - Oshindonga-Ombiimbeli Ondjapuki 2008 bible

Proverbs 22

¹Edhina olya simana li vule omaliko ogendji, nohokwe yi vule oshisiliveli noshingoli.

²Aayamba naathigona otaa tsakanekathana mushika: Omuwa okwe ya shiti ayehe.

³Omuntu onkotoki ota tala oshiponga e ta ka holama, ihe mboka yanathangwa omo taa yi e taa yemata.

⁴Ondjambi yeifupipiko netilo okutila Omuwa oyo uuyamba, esimano nomwenyo omule.

⁵Omano noomwigo odhi li mondjila yomugoyoki; ngoka ta gamene omwenyo gwe mwene, ota kala kokule nayo.

⁶Putudha omumati pandjila ndjoka e na okweenda nayo, nena nomuukulupe ita gamuka mo muyo.

⁷Omuyamba ota pangele oohepele, nomunangunga ota ningi omupika gwomulilwangunga.

⁸Ngoka ta kunu uukolokoshi, ota teya iiponga, nondhimbo yondjahi ye otayi teywa po.

⁹Omunamutimahenda ota yambekwa, molwashoka ta kutha koshithima she e ta pe oohepele.

¹⁰Tidha po omusheki, nena oontamanana odha hulu, ekondjo nehilathano tali pu po.

¹¹Ngoka e hole uuyogoki womutima nota popi oohapu oontoye, omukwaniilwa ota ningi kuume ke.

¹²Omeho gOmuwa otaga gamene owino, ihe ota keelele oohapu dhaaiteki.

¹³Omunanyalo ota ti: “Pondje ope na onime, otandi ka dhipagelwa mokati komapandaanda.”

¹⁴Okana komukiintu nakuhola iipala oko ekelo ele, omugeelwa kOmuwa ota gwile mo.

¹⁵Uugoya wa kanyatela momwenyo gwomumati, ihe olunwa otalu u tidha mo.

¹⁶Ngoka ta thiminike ohepele naangoka ta pe omuyamba omagano, ota yi moluhepo.

¹⁷Gameka okutsi kwoye, u pulakene oohapu dhaanawino; ndhindhilika omalongo gandje.

¹⁸Oshoka osho sho opala, ngele to ga pungula momwenyo gwoye; naga kale komilungu dhoye wi ilongekidha.

¹⁹Opo einekelo lyoye li kale mOmuwa, otandi ku longo ngashingeyi, eeno, ongoyelela.

²⁰Onde ku nyolele nale nokuli omatumbulo gowino, moka mu na omayele nuunongo,

²¹opo ndi ku longe oshili noohapu dhi shi kwiinekelwa, opo u yamukule oohapu dhoshili kungoka e ku tumu.

²²Ino yuga ohepele, omolwashoka oye ohepele ino lyata omukweyi e li muuyanda.

²³Omuwa ote mu popile, naayugi ye ote ya yugu omwenyo.

²⁴Ino endathana nomugeyentu, ngoye ino kala pamwe nomuntu omupwidhi.

²⁵Otashi vulika oto igilile omapola gawo e to ilukilile omwigo.

²⁶Ino kala mokati kaamboka haa koleke omauvaneko neminiko, mokati kaamboka haa lilathana oongunga.

²⁷Ngele ku na sha u fute, otaa kutha po ombete yoye.

²⁸Ongamba onkulu ya tendwa koohokulu, ino yi lundulula.

²⁹Ngele to mono omuntu onkulungu miilonga ye, ota vulu okuthikama kiipala yaakwaniilwa; ita pumbwa okuthikama koshipala shaathigona.