Read Oshindonga-Ombiimbeli Ondjapuki 2008 Proverbs 24 Bible Online

Proverbs 24 - Oshindonga-Ombiimbeli Ondjapuki 2008 bible

Proverbs 24

¹Aakolokoshi ino ya sila efupa, ngoye ino hala okukala pamwe nayo.

²Oomwenyo dhawo ohadhi dhiladhila iikolokosha, nomilungu dhawo otadhi eta iihuna.

³Egumbo otali tungwa po kowino, nokoondunge tali kala po lya kola;

⁴okuunongo oondunda dhalyo tadhi udhithwa omaliko gi ili nogi ili ge na ondilo nogo opala.

⁵Omunawino okwa kola, nomunongo ota koko moonkondo.

⁶Oshoka komayele oto vulu okuhinga iita yelago, nesindano oli li maagandjindunge oyendji.

⁷Owino oyi li omugoya pombanda, moshigongi shoposheelo shoshilando ita makula okana ke.

⁸Ngoka ta dhiladhila okulonga uuwinayi, ota lukwa omuniineya.

⁹Iipogo otayi zi momatokolo guulayi, nomusheki oye iihuna koshipala shaantu.

¹⁰Ngele to tenguka pethimbo lyuudhigu, nena oonkondo dhoye oonshona ngiini!

¹¹Hupitha mboka taa falwa konakupila, galula mboka taa tantala yu uka koshidhipagelo.

¹²Ngele to ti: “Tala, tse inatu shi tseya,” omukonakoni gwomitima okwe shi koneka. Ngoka ta dhiginine omwenyo gwoye, oku shi shi. Oye nota pe kehe tuu ngoka shi thike piilonga ye.

¹³Mumwandje, lya omagadhi goonyushi, oshoka omatoye, noshinuwa shomomagadhi goonyushi oshitoye kondakona yoye.

¹⁴Shi tseya kutya owino osho yi lile po omwenyo gwoye; ngele we yi likola, nena ou na elago konakuyiwa, netegameno lyoye itali ponyo.

¹⁵Omukeenakalunga ngoye, ino langela egumbo lyomuyuuki, ino hanagula po onkalelo ye.

¹⁶Oshoka omuyuuki nando ota gwile po luheyali, ota yambuka po, ihe omukeenakalunga ota ka tengukila momupya.

¹⁷Ino nyanyukwa, omutondi gwoye ngele ta gwile po; nongele ta tenguka, inashi ligolitha omutima gwoye,

¹⁸opo Omuwa kee shi mone, nopamwe otashi kala shi ipa momeho ge, nondjahi ye yi ze ko kuye.

¹⁹Ino dhimuka omolwaakolokoshi, ngoye ino sila aakaanakalunga efupa.

²⁰Oshoka omukolokoshi ke na elago konakuyiwa, olamba yaakaanakalunga otayi dhimi po.

²¹Mumwandje, tila Omuwa nomukwaniilwa, ino itula paatsindumbo.

²²Oshoka omupya gwawo otagu tukuluka ombaadhilila, nehulilo lyomimvo dhawo olye e li tseya?

²³Omayeletumbulo ngaka oga za kaanandunge. Okukala nolutandu moompangu osha puka.

²⁴Ngoka ta lombwele omusama ta ti: “Ou li mondjila,” iigwana otayi mu thingi, omihoko otadhi mu tula omutima.

²⁵Ihe mboka ihaa ningile mo, otaa kala nawa, neyambeko lyelago tali ya lambele.

²⁶Ngoka ta yamukula nawa, oongoka ta thipi komilungu.

²⁷Opaleka iilonga yoye pondje, ngoye u tule epya lyoye melandulathano; opo ihe oto ka tunga egumbo lyoye.

²⁸Ino ninga omupulakeneni gwamukweni osima yowala; nenge u mu kengelele nomilungu dhoye.

²⁹Ino tya: “Ngaashi a ningile ndje, osho tandi ke mu ningila, omuntu otandi mu longele ngaashi i ilongela.”

³⁰Onda pitile mepya lyomunanyalo, polwamba lwoshitsambe shomuntu kee na oondunge.

³¹Olya li lyu udha oondjoho, eputa lyalyo lya sa oongwena nenkolo lyalyo lya kumuka po.

³²Onde li tala nonda ndhindhilike, onde li lengalenga nondi ilongele ko:

³³Lala utale kashona, ifudhika po, ihukata utale,

³⁴nena oluhepo talu ku nukile ngomuyugi, nuuthigona ongomulumentu a homata.