Read Oshindonga-Ombiimbeli Ondjapuki 2008 Proverbs 25 Bible Online

Proverbs 25 - Oshindonga-Ombiimbeli Ondjapuki 2008 bible

Proverbs 25

¹Ngaka omayeletumbulo gaSalomo, ngoka aantu yaHiskia, omukwaniilwa gwaJuda, ye ga gongele.

²Esimano lyaKalunga olyo okumwenenena oohapu, ihe esimano lyaakwaniilwa okukonakona oohapu.

³Ngaashi tashi nyengana okukoneka iinima yi li mookathele kegulu nenge mookandoli kevi, osho wo omadhiladhilo ngoka ge li momutima gwomukwaniilwa.

⁴Kagunyuna ko omange koshisiliveli, nena omuhambudhi gwoshisiliveli ota hambula oshitenga sha yela nosho opala.

⁵Pegula omukeenakalunga pomukwaniilwa, nena oshipangelapundi she otashi ka kolekwa kuuyuuki.

⁶Ino ithela koshipala shomukwaniilwa ngoye ino laalela eha mokati kaakuluntu.

⁷Osho opala, ngele to lombwelwa taku tiwa: “Hedha huka kehala ewanawa,” shi vule okushundulwa komeho gomunenentu ngoka u li montaneho ye.

⁸Ino uluma okutamanana, pehulilo oto ka ninga ngiini, ngele mukweni te ku sitha ohoni.

⁹Tamanana oontamanana dhoye namukweni, ihe ino holola iiholekwa yaantu,

¹⁰opo ngoka te shi uvu kee ku nyeme, nowaa ye omuhe noshilongo.

¹¹Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.

¹²Omugandi omunandunge komupulakeni nawa okwa fa egola lyoshingoli nenge uulenga woshingolilela.

¹³Ngaashi uutalala wombambi pethimbo lyeteyo, osho omutumwa omwiinekelwa komutumi gwe, oshoka ota hekeleke omutumi gwe.

¹⁴Omuntu ngoka ti isimanekele omagano itee ga gandja, okwa fa ombepo niikogo yaa na omvula.

¹⁵Neidhidhimiko omupangeli oha nengenekwa, nelaka etalala tali panda omasipa.

¹⁶Nge wi itsu omagadhi goonyushi, ga lya nondjele, waahe ga kunyukwe e to ga kungu ko.

¹⁷Inda ngaa kaandjamushiinda gwoye olupita, opo keehe ku vulwe e te ku kenyanana.

¹⁸Omupulakeneni gwamukwawo e na iifundja, okwa fa onkulundhimbo, egongamwele noshikuti sha tsa.

¹⁹Okwiitula omuhasha mesiku lyuudhigu okwa fa eyego lyomututu nompadhi ya lemana.

²⁰Okwiimbila omuntu gwomwenyo gwa ziyalala okwa fa okwiihula oonguwo esiku lyuutalala nenge okutula omaetika momeya gomutoko.

²¹Omutondi gwoye ngele a sa ondjala, mu pakela po, nongele a sa enota, mu pa omeya a nwe.

²²Oshoka moku shi ninga oto gongele omakala ga tema komutse gwe, Omuwa note shi ku galulile uuwanawa.

²³Ombepo yokuuzilo otayi eta omvula, nelaka ndyoka tali popi omalundilo, otali lulike iipala.

²⁴Okukala koshungo yongulu oku vule okukala megumbo limwe nomukulukadhi e na omulungu.

²⁵Omulombo omwaanawa gwa za koshilongo shokokule ogwa fa omeya omatalala taga talaleke omunotelwa.

²⁶Omuyuuki ta funga koshipala shomukeenakalunga, okwa fa oluthithiya lwa vongolwa nomuthima gwa lyatagulwa.

²⁷Inashi opala okulya omagadhi goonyushi ogendji, nosha sheshwa omuntu okwiikongela esimano.

²⁸Omulumentu kee shi kwiidhidhimika, okwa fa oshilando sha teka po shaa na edhingililokuma.