Read Oshindonga-Ombiimbeli Ondjapuki 2008 Proverbs 27 Bible Online

Proverbs 27 - Oshindonga-Ombiimbeli Ondjapuki 2008 bible

Proverbs 27

¹Ino itangela esiku lyanofu, oshoka ino tseya esiku ndyoka shoka tali etelele.

²Etha gulwe e ku tange, hakana koye mwene; gulwe i ili ne shi ninge, hamilungu dhoye mwene.

³Emanya olyo edhigu, nevi oli na ondjundo, ihe ekehuko omolwegoya edhigu li vule ayihe mbika iyali.

⁴Ongeyo ondhigu, ondjahi oya fa efundja, ndele olye ta vulu okuthikamena uukodhi?

⁵Ekumagidho lyomontaneho oli vule ohole ya holekwa.

⁶Iinoto ya notolwa komuholike, oyi na elalakano lyu uka, ihe ethipo lyokomilungu lyomutondi, li kotokela!

⁷Omuntu a kuta ota lyatagula nomagadhi goonyushi, ihe ngoka a sa ondjala, oku uvite niilulululu iitoye.

⁸Ongondhila tayi tuka kokule noshihandhila shayo, osho wo omuntu ngoka a pukile e li kokule noyaandjawo.

⁹Omagadhi gomugwayo niitsinino ohayi nyanyudha omutima; osho wo ohole yakuume ngoka e na ehalo lyokupukulula.

¹⁰Ino thiga po kuume koye nakuume kaho; mesiku lyomupya gwoye ino ya kaandjamumwanyoko. Omushiinda ngoka e li popepi nangoye oku vule omumwanyoko ngoka e li kokule.

¹¹Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.

¹²Omunawino ota dhimbulula oshiponga e te shi holama, manga aasama taa nduungile yu uka ko e taa itsu musho.

¹³Kutha po onguwo yaangoka a popile gulwe, nou mu kuthe a ninge ombambyona yomukwiilongo.

¹⁴Ngoka ta koloma noti igidhile mukwawo omayambeko moontundumene, otashi mu yalulilwa etulomutima.

¹⁵Ontongo tayi ziya esiku lyomuzimbi nomukulukadhi e na omulungu oya faathana.

¹⁶Ngoka a hala oku mu holeka, ota holeke ombepo, ota kwata omagadhi nolulyo lwe.

¹⁷Oshitenda ohashi wege oshitenda oshikwawo, omuntu oha wege omuntu omukwawo.

¹⁸Ngoka ta tekula omukwiyu, ota li oonkwiyu, naangoka ta yakula nawa mwene gwe, ota ka simanekwa.

¹⁹Ngaashi oshipala tashi imonene momeya, osho omutima gwomuntu tagu monika kumukwawo.

²⁰Oshaasi nonakupila ihayi kuta, nomeho gomuntu ihaga kuta.

²¹Ontelekelo oyoshisiliveli neziko olyoshingoli, ihe omuntu ota yelekwa nesimano ndyoka ta simanekwa nalyo.

²²Egoya nando u li tsile koshini mumwe noomuma, uugoya walyo itau zi mo.

²³Koneka nokukonekelela iipala yoonzi noyiikombo yoye, dhiginina iimuna yoye.

²⁴Oshoka eliko itali kala sigo aluhe, noshishani otashi thiki tuu kepipi nepipi?

²⁵Omwiidhi nge gwa muwa nohuluhulu tayi holoka niigwanga yokoondundu tayi gongelwa,

²⁶nena uunzigona otau gandja oonguwo kungoye niikombo iimaliwa yokulanda epya.

²⁷Ou na omahini gomoosi giikombo ga gwanena oku ku palutha negumbo lyoye naalelwa yoye.