Read Oshindonga-Ombiimbeli Ondjapuki 2008 Proverbs 29 Bible Online

Proverbs 29 - Oshindonga-Ombiimbeli Ondjapuki 2008 bible

Proverbs 29

¹Omuntu ngoka a geelwa e ta kukutike aluhe othingo ye, ota teywa po pwaa na ehungo lyasha.

²Aayuuki nge taa indjipala, oshigwana otashi nyanyukwa, ihe aakaanakalunga nge taa pangele, oshigwana otashi keme.

³Omuntu ngoka e hole owino, ota nyanyudha he, ihe ngoka ta vundakana noohonda, ota hanagula po eliko lye.

⁴Omukwaniilwa ota lele oshilongo she nuuyuuki, ihe ngoka ta yugu aantu, ote shi teya po.

⁵Omuntu ngoka ta mbembeleke mukwawo, ota lukile omwigo kohi yoonkatu dhe.

⁶Omudhudhu oha yulwa keyono lye mwene, ihe omuyuuki ota ka ligola nokunyanyukwa.

⁷Omuyuuki okwa tseya onkalo yoohepele, ihe omukeenakalunga ke na ko nasha nayo.

⁸Aasheki ohaa piyaganeke oshilongo, ihe aanawino ohaa kodheke ondjahi.

⁹Omunawino ngele ota hokololithathana moompangu negoya, egoya onkee lya kudhila nduno nokuyola pwaa na elotelo.

¹⁰Aadhipagi ohaa tondo omukeenashipwe, ohaa kongo oomwenyo dhaayuuki.

¹¹Omugoya ota mana mo ondjahi ye ayihe, ihe omunawino ohi ikwata.

¹²Omukwaniilwa ngoka ta pulakene oohapu dhiifundja, aapiya ye ayehe otaa ningi aakaanakalunga.

¹³Ohepele nomuthiminiki otaa tsakanene, Omuwa ota minikile omeho gawo ayehe yaali.

¹⁴Omukwaniilwa ngoka tu uthile oohepele pauyuuki, oshipangelapundi she otashi kala sha kola aluhe.

¹⁵Olunwa negeelo ohali gandja owino, ihe omumati ngoka a lelwa ondembula, ota sitha yina ohoni.

¹⁶Aakaanakalunga ngele taa indjipala, omayonagulo otaga indjipala wo, ihe aayuuki otaa ke ya tala, sho taa kana po.

¹⁷Putudha omumwoyemati, nena ote ke ku vululukitha, e ta ka nyanyudha omwenyo gwoye.

¹⁸Ngele kape na ehololo, oshigwana otashi pwidhuka; ihe omunelago oongoka ta dhiginine ompango.

¹⁹Omupiya iha londodhwa koohapu, oshoka oku uvite ko nawa, ihe ke na ko nasha nadho.

²⁰Owa mona tuu omuntu a sa ompiya okupopya? Omusama oku na wo etegameno e mu vule.

²¹Omuntu ngele ta lele omupiya gwe ondembula okuza kuunona, komeho ote ke ku pilukila.

²²Omugeyentu oha tukula oontamanana, nomukehuki oku na omayono ogendji.

²³Uuntsa womuntu otau mu shundula, ihe omwiifupipiki ota simanekwa.

²⁴Ngoka taa topolelathana nomufuthi oshinima, ota tondo omwenyo gwe mwene; otu uvu eganitho ye ita holola sha.

²⁵Okutila omuntu okulukila omwigo, ihe ngoka ti inekele Omuwa, ota gamenwa.

²⁶Oyendji ohaa kongo ohokwe koshipala shomukwaniilwa, ihe uuyuuki womuntu ohau zi kOmuwa.

²⁷Omuntu omufundja oye iihuna koshipala shaayuuki, nomuyuuki koshipala shaakaanakalunga.