Read Oshindonga-Ombiimbeli Ondjapuki 2008 Proverbs 3 Bible Online

Proverbs 3 - Oshindonga-Ombiimbeli Ondjapuki 2008 bible

Proverbs 3

¹Mumwandje, ino dhimbwa omalongo gandje, dhigininitha omutima gwoye iipango yandje,

²oshoka otayi lelepaleke omimvo dhokukalamwenyo kwoye e tayi ku etele elago.

³Ohole nuudhiginini inayi ku thiga po, yi zala mothingo yoye, yi nyolela koshipelende shokomutima gwoye.

⁴Ngele oto shi ningi, oto ka mona esilohenda nedhina ewanawa koshipala shaKalunga noshaantu.

⁵Inekela Omuwa nomutima gwoye aguhe noino igameka koondunge dhoye mwene.

⁶Mu tseya moondjila dhoye adhihe, nena oondjila dhoye ote dhi yelekanitha.

⁷Ino kala omunawino momeho goye mwene; tila Omuwa, gamuka kuuwinayi.

⁸Otashi ka ninga ealudho lyolutu lwoye nendjangeko lyomasipa goye.

⁹Simanekitha Omuwa miinima yoye nomoshipe shiilikolwa yoye ayihe.

¹⁰Ngele oto shi ningi, iigandhi yoye otayi ka udha eloolo, nomatemba goye gokukolela otaga ka tikila omaviinu.

¹¹Mumwandje, ino dhina eputudho lyOmuwa, nomageelo ge inage ku sitha uunye,

¹²oshoka Omuwa ota dhenge ngoka e hole, ngaashi he, omwana ngoka a hokwa.

¹³Omunelago omuntu ngoka a likola owino, nomuntu ngoka a pewa oondunge.

¹⁴Oshoka oku dhi likola okuwanawa ku vule oshisiliveli, notadhi etitha ontanitho yi vule ndjoka yoshingoli.

¹⁵Odhi na ondilolela dhi vule uuwe, nomaliko goye agehe guuyamba itaga yelekwa nadho.

¹⁶Molulyo lwowino omu na omwenyo omule, nomolumoho lwayo uuyamba nesimano.

¹⁷Owino otayi toyaleke okukala kwomuntu nokwoopaleka omapola ge agehe.

¹⁸Oyo omuti gwomwenyo gwaamboka taye yi kwata, naanelago oomboka taye yi dhiginine.

¹⁹Omuwa okowino ye a dhike evi, nokuunkulungu we a yalaleke egulu.

²⁰Kuunongo we oothithiya dhomuule odha tsipuka, niikogo tayi gu omume.

²¹Mumwandje, dhiginina owino neuveko, ino yi kanitha momeho goye.

²²Oyo omwenyo kungoye nuulenga womothingo yoye.

²³Otayi ku enditha nondjila yoye waa na mbudhi, noompadhi dhoye itadhi ipumu koshithindi.

²⁴Ngele to ka lala, ito ka haluka, noomposi dhoye odho oontoye.

²⁵Ito pumbwa okutila ehalutho lyohaluka nenge ekano lyombadhilila lyaakaanakalunga.

²⁶Oshoka Omuwa oye einekelo lyoye, noye ta gamene ompadhi yoye komwigo.

²⁷Omuntu ino mu tindila eyakulo ewanawa ndyoka to vulu oku li mu yakulitha.

²⁸Ino lombwela mukweni to ti: “Inda ngoye u galuke, otandi ke ku pa ngula,” manga u na sha peke.

²⁹Ino etela oshiponga ngoka a kala pungoye nokwe ku inekela.

³⁰Ino tamanana nomuntu pwaa na etompelo lyasha, ye inee ku hinda.

³¹Omuntu omupwidhi ino mu sila efupa, noino landula nando ondjila ye.

³²Omugoyoki oye iihuna koshipala shOmuwa, ihe Omuwa okwi inekela aayuuki.

³³Etulomutima lyOmuwa oli li megumbo lyomukeenakalunga, ihe egumbo lyomuyuuki ote li yambeke.

³⁴Aashekedhi ote ya sheke, ihe aaifupipiki ote ya sile ohenda.

³⁵Aanawino otaa ka thigulula esimano, ihe aagoya otaa ka likola ohoni.