Read Oshindonga-Ombiimbeli Ondjapuki 2008 Proverbs 6 Bible Online

Proverbs 6 - Oshindonga-Ombiimbeli Ondjapuki 2008 bible

Proverbs 6

¹Mumwandje, pamwe owu uvaneka, u kalele po omunangunga gwontumba,

²owa kwatelwe melaka lyomoohapu dhoye, owa yulwa momauvaneko goye.

³Mumwandje, oshoka ou li miikaha yamukweni, ninga shika, opo u ihupithe: Inda ke mu inyongamene noku mu thiminika.

⁴Omeho goye ino ga pitikila oomposi noombafu dhoye ekumuko.

⁵Ihupitha ngohumba ya zi koshakapalu, ongondhila moshikaha shomuyuli gwoondhila.

⁶Omunanyalo ngoye, inda kuudhidhi, u tale oondjila dhawo e to ningi oondunge.

⁷Kau na omuthiminiki, omutaleli nenge omuleli,

⁸ihe otau longekidha iikulya yawo mothinge, tau pungula iipalutha yawo peteyo.

⁹Munanyalo ngoye, oto lala sigo uunake, oto ka papudhuka luni moomposi dhoye?

¹⁰To kotha po kashona, to kumuka po okathimbo, to gonyo oshikaha shoye u gondje po,

¹¹noluhepo otalu matuka lwa fa omuyugi, nuuthigona wa fa omulumentu a homata.

¹²Omudhudhu, omukolokoshi oye ngoka e na okana komakoto.

¹³Omeho pakupaku, ta nyata evi noompadhi nominwe ta ningi omandhindhiliko,

¹⁴momutima gwe omu na omakoto, ote eta iihuna ye ta kunu olutandu.

¹⁵Onkee ano ekano tali ya ohaluka, mokathimbo ta ka teywa po pwaa na ealudho lyasha.

¹⁶Iinima mbika ihamano Omuwa e tonde, niiheyali oyo iihuna komwenyo gwe:

¹⁷Omeho ge na uuntsa, elaka lyiifundja, iikaha tayi tilehi ombinzi yaa na ondjo,

¹⁸omutima tagu dhiladhila omatedho giiponga, oompadhi tadhi endelele okuya kuuwinayi,

¹⁹shaa ngoka ta taandelitha oonzapo dhiifundja naangoka ta kunu olutandu mokati kaamwayina.

²⁰Mumwandje, dhiginina oshipango shaho, ngoye ino ekelahi omapukululo ganyoko.

²¹Ga pungula aluhe momutima gwoye, ngoye u ga zale mothingo yoye.

²²Nage ku wilike aluhe, nge to ende; ge ku tonatele, nge to kotha; noge ku popithe, nge wa penduka.

²³Oshoka oshipango osho olamba, omapukululo ogo uuyelele nomakumagidho geputudho ogo ondjila yu uka momwenyo.

²⁴Otage ku gamene komukiintu nakuhola iipala, komuthiminiki gwelaka lyomuthenu.

²⁵Embweshukilo lye ino li haluka momutima gwoye, ino pitika e ku kwate nepepo lyoombafu dhe.

²⁶Omukiintu ohonda ota gu owala okapambu koshikwiila, ihe omuholi gwiipala omuhokanwa ote ku yulu omwenyo gwoyelela.

²⁷Oku na tuu ngoka ta humbata omulilo monguwo ye, ndele onguwo tayi kala inaayi pya?

²⁸Nenge oku na tuu ngoka te ende komakala ga hanya e ta kala inaa pya koompadhi dhe?

²⁹Osho ta ningwa ngoka ta lala nomukiintu gwamukwawo: shaa ngoka te mu gumu, ita kala inaa geelwa.

³⁰Ino dhina omufuthi ngoka ta yaka omolwondjala.

³¹Ngele ta monika, ota futu luheyali, ta gandja po emona lyegumbo lye alihe.

³²Shaa ngoka ta yi nomukiintu moluhondelo, oye omulayi, oye tuu ngoka a hala a yone po omwenyo gwe mwene.

³³Omadhengo nohoni oyo oshipewa she, nohoni ye itayi honyuluka.

³⁴Oshoka uukodhi ohau geyitha omulumentu, nomesiku lyoku mu geela ite mu sile nando ohenda.

³⁵Ye ita taamba iikahu yasha noita zimine iisimpo, nando u yi ninge oyindjiyindji.