Read Oshindonga-Ombiimbeli Ondjapuki 2008 Proverbs 7 Bible Online

Proverbs 7 - Oshindonga-Ombiimbeli Ondjapuki 2008 bible

Proverbs 7

¹Mumwandje, dhiginina oohapu dhandje, niipango yandje yi pungula momwenyo gwoye.

²Dhiginina iipango yandje, opo u kale u na omwenyo, gamena omalongo gandje ongondanda yeho.

³Ga zala kominwe dhoye, ngoye u ga nyolele koshipelende shokomutima gwoye.

⁴Lombwela owino u tye: “Ngoye okamwameme,” nou luke oondunge omukwezimo gwoye,

⁵opo dhi ku gamene komukiintu omuholi gwiipala, komuthiminiki gwelaka lyomuthenu.

⁶Oshoka sho nda talele mekende lyiitenda ya tatakana lyongulu yandje,

⁷onda mono maantu yanathangwa nonda ndhindhilike mokati kaagundjuka omumati omugoya.

⁸Okwa li te ende mepandaanda popepi nokolonela mpoka pu na egumbo lyomukiintu gwontumba.

⁹Okwa li kwa wiwila, uuyelele wa kuka nomilema tadhi ya.

¹⁰Tala ihe, omukiintu te ya e mu tsakaneke, a zala lela ngohonda e na iihulo komwenyo.

¹¹Ke na evululuko, ke na nando ohoni, oompadhi dhe ihadhi vulu okukala megumbo —

¹²uuna e li mepandaanda nuuna eli momahalandjandja, ota thikama pokolonela kehe nota ontamene.

¹³Okwa shambakana omugundjuka e te mu thipi komilungu. Ke na nando ohoni moshipala, sho te mu lombwele ta ti:

¹⁴“Onda li ndi na okuyamba omahambelelondjambo, onenanena nda futu omauvaneko gandje.

¹⁵Omolwashoka nda piti mo ndi ku tsakaneke, onde ya ndi konge oshipala shoye, ndele nani nde ku mono.

¹⁶Ombete yandje onde yi yala noolakana, nelapi lyoompola lya tungika lyoliina yokuEgipiti.

¹⁷Tala kuume, ombete onde yi shashamina omira, endombo nokanakamuma.

¹⁸Ila tu kolwe kohole, sigo ongula taku shi, natu nyanyudhathane megwanitho lyuuhalu wetu.

¹⁹Oshoka gwaandjetu nena ke po, okwa za po a ya kokulekule.

²⁰Okampunda kiimaliwa okwa yi nako, ota ka galuka omwedhi sho gwa toka.”

²¹Omukiintu okwe mu hongolola noohapu dhokupopya kwe, komuthenu gwomilungu dhe okwe mu pukitha.

²²Ohaluka omumati e mu landula a fa ondumetana tayi ka tselwa, nongaashi omenye tayi ifala meso,

²³sigo oshikuti tashi ulula ehuli lye, ongondhila tayi endelele tayi tukile komwigo noinayi tseya, ngele otashi pula omwenyo gwayo.

²⁴Aamwandjemati ne, pulakenii ndje ne mu uve oohapu dhomokana kandje.

²⁵Omutima gwoye inagu lambalala oondjila dhomukiintu ngoka, ngoye waa pukile momapola ge.

²⁶Oshoka oyendji ya si mboka a pundukitha, noyendjiyendji mboka a dhipagitha.

²⁷Egumbo lye oondjila dhu uka moshaasi, ndhoka tadhi kulukile moondjugo dhomuusi.