Read Oshindonga-Ombiimbeli Ondjapuki 2008 Proverbs 9 Bible Online

Proverbs 9 - Oshindonga-Ombiimbeli Ondjapuki 2008 bible

Proverbs 9

¹Owino oya tungu egumbo lyayo, oya keke oongudhi dhayo heyali.

²Oya tsele iimuna yayo, oya hanga omaviinu gayo nokundeeka oshitaafula shayo.

³Oya tumu aadhike yayo, otayi hiya tayi igidha muule wopombanda moshilando:

⁴“Ngoka gwanathangwa ne ye huka.” Ngoka kee na omayele, otayi mu lombwele tayi ti:

⁵“Ileni, lyeni oshikwiila shandje ne mu nwe omaviinu ngoka nde ga hanga.

⁶Etheni uunathangwa, opo mu kale mu na omwenyo; endeni momapola goondunge.”

⁷Ngoka ta kumagidha omusheki, oti isitha ohoni, naangoka ta geele omukeenakalunga, ota nyatekwa kohoni.

⁸Ino geela omusheki, ota ningi e ku tonde; geela omunandunge, nota kala e ku hole.

⁹Longa omunandunge, noondunge dhe otadhi koko natango; nongeka omuyuuki, noti indjipalitha uunongo we.

¹⁰Etilokalunga olyo ekota lyowino, nokutseya Omuyapuki okwo uunongo wo wene.

¹¹Oshoka keyakulo lyandje omasiku goye otagi indjipala, nomimvo dhokukalamwenyo kwoye tadhi gwedhelwa ko.

¹²Ngoye ngele omunawino, owino yoye otayi ku kwatha; ngele omusheki, nena oto ke shi mona.

¹³Uugoya oye omukiintu kee na egundjilo; oye uunathangwa wo wene noke na sho e shi.

¹⁴Ota kuutumba peelo lyegumbo lye nokuule wopombanda moshilando,

¹⁵opo a hiye mboka taye ende mondjila taa piti po, oomboka tayi iyendele noondjila dhawo yu ukilila komeho, ta ti:

¹⁶“Ayehe mboka yanathangwa naa ye huka!” Naangoka kee na oondunge, ote mu lombwele ta ti:

¹⁷“Omeya ga yakwa omatoye, noshikwiila sha lilwa kuukololo, osha towala.”

¹⁸Inaa tseya kutya oku na iihelele, aahiywa ye oye li muule woshaasi.