Read Oshindonga-Ombiimbeli Ondjapuki 2008 Ecclesiastes 1 Bible Online

Ecclesiastes 1 - Oshindonga-Ombiimbeli Ondjapuki 2008 bible

Ecclesiastes 1

¹Ndhika oohapu dhomuuvithi, omuna gwaDavid, ngoka a li omukwaniilwa muJerusalem.

²Omuuvithi ota ti: “Ayihe oyowala, eeno, ayihe oyowalawala!”

³Omuntu oti ilikolele shike mokwiipyakidhila kwe akuhe kohi yetango?

⁴Epipi limwe tali ka pita nekwawo otali ya, ihe evi otali kala sigo aluhe.

⁵Etango otali piti, netango otali ningine nokushuna ishewe pehala mpoka hali pitile.

⁶Ombepo otayi pepe yu uka kuumbugantu notayi ka galukila kuumbangalantu; otayi idhingoloka aluhe nokugalukila komakundukilo gayo.

⁷Omilonga adhihe otadhi tondokele mefuta, ihe efuta itali udha nando; kehala hoka omilonga tadhi tondokele, otadhi tondokele ko aluhe.

⁸Iinima ayihe oyi na eipyakidhilo nokape na omuntu ta vulu oku shi popya. Eho ihali kuta okutala, kwo okutsi ihaku vulwa okupulakena.

⁹Shoka sha li ko, otashi ka kala ko ishewe; shoka sha ningwa, otashi ka ningwa natango.

¹⁰Kohi yetango kaku na sha taku tiwa: “Tala utale, shika oshipeepee!” Oko sha li nale muuyuni waakulu yonale.

¹¹Kaku na ondhimbuluko yasha yootatekulu, nomapipi ngoka tage ya, itaga dhimbulukiwa kungoka taga ka kala ko ohugunina.

¹²Ngame omuuvithi onda li omukwaniilwa gwaIsrael muJerusalem.

¹³Ondu ukitha omwenyo gwandje kekonakono lyuunongo nokudhiladhila ayihe mbyoka tayi ningwa kohi yegulu. Shika osho oshinakugwanithwa oshidhigu Kalunga e shi pe aana yaantu, ya se oshimpwiyu nasho.

¹⁴Onda mono iilonga ayihe mbyoka tayi ningwa kohi yetango; ayihe oyowala nokutidha ombepo.

¹⁵Shoka sha goyoka, itashi vulu okuuthwa, naashoka shaa po, itashi vulu okuyalulwa.

¹⁶Ondi ipopile nda ti: “Tala, onda koko nonda likola aluhe owino oyindji ndi vule ayehe mboka ya tetekelele ndje okulela muJerusalem, nomwenyo gwandje ogwa mono owino nuunongo.”

¹⁷Ihe sho nda yelutha omwenyo gwandje, ndi ilonge okutseya owino nuunongo nokuuva ko uugoya nuusama, onde shi dhimbulula kutya nani osho okutidha ombepo.

¹⁸Oshoka mowino oyindji omo mu na uupyakadhi owindji naangoka ti indjipaleke uunongo, oti indjipalitha uuwehame.