Read Oshindonga-Ombiimbeli Ondjapuki 2008 Ecclesiastes 12 Bible Online

Ecclesiastes 12 - Oshindonga-Ombiimbeli Ondjapuki 2008 bible

Ecclesiastes 12

¹Dhimbulukwa Omushiti gwoye momasiku guugundjuka woye, manga omasiku guudhigu inaage ya nomimvo inaadhi hedha ko, uuna to ka popya to ti: “Inandi dhi hokwa.”

²Momasiku ngoka etango, omutenya, omwedhi noonyothi otadhi ka kala dha luudha, niikogo ohayi galuka konima yomvula.

³Omasiku ngoka aalangeli yegumbo taa ka kakama, aalumentu aanankondo taa andalalithwa, aatsi taa zimbuka, oshoka oya ninga po aashona, naamboka taye entamene momakende taa kala momilema.

⁴Omasiku ngoka omiyelo dha taalela omapandaanda, otadhi ka kala dhe edhilwa po, omuthindo gwokoshini ogwa shonopala, omuntu ota penduka po, ngele uudhila opo tau tameke okulila, nomawi agehe oga gogoma.

⁵Omuntu ota kala a tila momitunda, nomondjila omu na iihaluthi. Omuti omumandeli tagu tsapuka oonsheno, oshipethipethi tashi ende tashi gaganyata, noonkuto dhoshihwa shokaperi itadhi eta we uuhalu wokulya. Omuntu ota yi kegumbo lye lyaaluhe, naalilasa taye endaenda momapandaanda.

⁶Ongodhi yoshisiliveli otayi tokoka, noshiyuma shoshingoli otashi tatuka. Oshiyuma shomeya otashi tatukile pomuthima, noshikweyitho otashi gwile monyombo.

⁷Ontsi otayi shuna mevi, ngaashika ya li nale, nombepo otayi galukile kuKalunga, ngoka e yi gandjele.

⁸Ayihe oyowala, omuuvithi ota ti, ayihe oyowalawala, owaleelela.

⁹Omuuvithi ka li ashike omunawino, okwa longo wo aantu uunongo, okwa dhiladhila e ta konakona, okwa tungu omayeletumbulo ogendji.

¹⁰Omuuvithi okwa kongo a mone oohapu dho opala nodha nyolwa dhu uka, oohapu dhoshili.

¹¹Oohapu dhaanawino odha fa iishongitho nomatumbulo gawo oomboha dha dhengelwa muule; oga gandjwa kOmusita gumwe awike.

¹²Naishewe, mumwandje, londodhwa kushika: okunyola omambo ogendji ihaku hulu, nokwiipyakidhila nokulesha unene ohaku lolokitha olutu.

¹³Ekota lyaashihe shu uvika, olyo ndika: Tila Kalunga nou dhiginine iipango ye, oshoka aantu ayehe osho ye na okuninga.

¹⁴Oshoka Kalunga ote eta iilonga ayihe mepangulo, ndyoka tali adha iinima ayihe ya holekwa, iiwanawa nenge iiwinayi.