Read Oshindonga-Ombiimbeli Ondjapuki 2008 Ecclesiastes 4 Bible Online

Ecclesiastes 4 - Oshindonga-Ombiimbeli Ondjapuki 2008 bible

Ecclesiastes 4

¹Konima yaambika onda tala komahepeko agehe taga ningwa kohi yetango. Onda mono omahodhi gaahepekwa nokaye na omutalaleki; aahepeki yawo oya li aanankondo, ihe aahepekwa kaya li ye na omutalaleki.

²Onkee ano nda tanga aasi mboka ya sa nale, oyo aanelago ye vule aantu mboka ye na omwenyo ngashingeyi.

³Ihe omunelagolela e ya vule ayehe mboka yaali, oye ngoka inaa valwa noina mona uukolokoshi mboka tau longwa muuyuni.

⁴Komeho onda dhimbulula kutya omaipyakidhilo agehe nuulaadhi miilonga owo okusilathana efupa. Naashika wo owaleelela nokutidha ombepo.

⁵Egoya otali ihukata omaako e tali ikunya onyama yalyo lyene.

⁶Ekaminina lyevululuko oli vule eshambekela lyu udha uupyakadhi nokutidha ombepo.

⁷Naishewe onda mono ko oonkambadhala dhowala kohi yetango.

⁸Oku na gumwe awikewike kee na mukwawo omutiyali, ke na wo omwanamati nenge omumwayina; ihe kape na ehulilo koonkambadhala dhe adhihe dhiilonga ye, omeho ge itaga kuta uuyamba. Ano otandi ihepekele lye notandi idhilike uuwanawa? Naashika wo owalalela nosha puka.

⁹Yaali ye vule gumwe, oshoka oye na ondjambi ombwanawa yomaipyakidhilo giilonga yawo.

¹⁰Oshoka gumwe ngele ta punduka, mukwawo ota vulu oku mu toola po, ihe yayee ngoka ta punduka po pwaa na mukwawo e mu toole po.

¹¹Natango tuu yaali nge ya lala pamwe, otaa ningilathana omuyenye, ihe gumwe oti ipupyaleke ngiini?

¹²Ngele oku na ngoka ta matukile po gumwe, nena ayehe yaali otaye mu thikamene. Ongodhi ya yogohwa oondali ndatu, ihayi tokoka mbala.

¹³Omugundjuka ohepele, ihe oku na oondunge, oku vule omukwaniilwa a kulupa kee na oondunge noke shi kulombwelwa,

¹⁴nando a zile mondjedhililo a ka ninge omukwaniilwa, nenge a zile muuhepele a ka lele oshilongo.

¹⁵Onda mono, nkene aanamwenyo ayehe mboka ya kala kohi yetango ya gama kombinga yomugundjuka ngoka te mu landula.

¹⁶Kakwa li ku na ehulilo lyaantu ayehe mboka e ya kwatele komeho. Ihe aatekulu ye inaye mu nyanyukilwa. Osho ngaaka shika owaleelela nokutidha ombepo.