Read Oshindonga-Ombiimbeli Ondjapuki 2008 Ecclesiastes 5 Bible Online

Ecclesiastes 5 - Oshindonga-Ombiimbeli Ondjapuki 2008 bible

Ecclesiastes 5

¹Gamena oompadhi dhoye, nge to yi kongulu yaKalunga. Okuhedha ko noku ka pulakena oku vule aasama taye eta oontselelandjambo, oshoka kaye na oondunge, nosho ngeyi haa yono.

²Ino ulumika okana koye, nomwenyo gwoye ino gu endelelitha okupopya oohapu koshipala shaKalunga, oshoka Kalunga oku li megulu, nangoye ou li kombanda yevi. Onkee oohapu dhoye odhi na okukala oonshona.

³Oshoka oondjodhi ohadhi zi miimpwiyu oyindji nokupopya kwomugoya omoohapu odhindji.

⁴Ngele to uvanekele Kalunga euvaneko, ino shelelelwa oku li gwanitha, oshoka omagoya inage mu opalela. Gwanitha shoka wu uvaneke.

⁵Okukala inoo uvaneka sha hwepo, shi vule okuuvaneka ngoye ito tompola sha.

⁶Ino pitika okana koye ke ku etele ondjo. Ino popya koshipala shomumbala gwaKalunga u tye: “Euvaneko lyandje olya li epuko.” Omolwashike Kalunga e na okugeyithwa koohapu dhoye nokuyona po iilonga yiikaha yoye?

⁷Oshoka oondjodhi noohapu odhindji odhowala, ihe ngoye tila Kalunga.

⁸Ngele to mono ko ehepeko lyoohepele negoyokitho lyomautho nuuyuuki moshilongo, ino kuminwa oshinima shoka, oshoka omunene ota tonatele omunene omukwawo, naanene ishewe ye ya vule taye ya tonatele.

⁹Uuwanawa woshilongo, ongele omapya agehe taga kala ge na omukwaniilwa.

¹⁰Nakuhola iimaliwa ihe yi kuta, nanakuhola uuyamba iha gwana. Naashika owaleelela.

¹¹Iinima ngele tayi indjipala, naali otaa indjipala wo; mwene gwayo ota mono mo omupondo gwashike, shila oku yi tongolola owala?

¹²Oomposi dhanakulonga oontoye, ashihe shimwe, ngele ta li oshindji nenge oshishona, ihe eloolo lyomuyamba otali mu imbi oomposi.

¹³Oku na oshiponga oshidhigu nde shi mono kohi yetango: uuyamba tau pungulwa kumwene gwawo, sigo oshiponga she she ya.

¹⁴Omaliko taga kana molwoshiponga. Nando na vale omunona omumati, ita thigulula sha.

¹⁵Ngashika a zile mela lyayina olutu lwowala, osho ta ka ya owala ngashika a zile mo; noita ka faalela sha shomiilonga yuupyakadhi we a ye nasho.

¹⁶Naashika oshipongalela: ngaashi a zile mo, osho ngaa ta ka ya. Okwa mono shike miilonga mbyoka yowala i ipyakidhile nayo?

¹⁷Omasiku ge ote ga manene momilema, noku na uuwehame, ehepeko nondjahi.

¹⁸Onda koneka kutya osho opalela omuntu a lye ye a nwe a nyanyukilwe uuwanawa wuupyakadhi we mboka i ipyakidhile nawo kohi yetango momasiku omafupi gokukalamwenyo ngoka Kalunga e ge mu pa, oshoka osho oshipewa she.

¹⁹Osho omagano gaKalunga, ngele ota pe omuntu uuyamba nomaliko e te mu pe ompito yokulya ko nokutaamba oshipewa she, opo i inyanyudhe miilonga ye yuupyakadhi.

²⁰Oshoka iha dhimbulukwa unene omasiku gokukalamwenyo kwe, molwashoka Kalunga e mu pitikile i ipyakidhile nenyanyu lyokomwenyo gwe.