Read Oshindonga-Ombiimbeli Ondjapuki 2008 Ecclesiastes 7 Bible Online

Ecclesiastes 7 - Oshindonga-Ombiimbeli Ondjapuki 2008 bible

Ecclesiastes 7

¹Edhina lya simana oli vule omugwayo gwa nika nawa, nesiku lyokusa oli vule esiku lyokuvalwa.

²Okuya koshigumbo taku lilwa oosa oku vule okuya kegumbo li na oontselela, oshoka eso olyo ehulilo lyaantu ayehe, nomunamwenyo ote shi dhiladhila momutima gwe.

³Okunika uupongo oku vule okuyola, oshoka oshipala ngele shi na oshizimbi, nena omwenyo ogu li nawa.

⁴Omutima gwaanandunge otagu kala moshigumbo shoosa, manga omutima gwaagoya gu li megumbo lyenyanyu.

⁵Okupulakena egando lyomunandunge oku vule okupulakena eimbilo lyomagoya.

⁶Oshoka iikwekwela yaagoya oya fa omityotyomo dhomano taga pi kohi yombiga. Shika owaleelela.

⁷Okwiihakanena iimaliwa otaku goyapaleke omunandunge, noombumbo otadhi nyateke omutima.

⁸Ehulilo lyoshinima oli vule etameko lyasho. Omutalanteni oku vule omwiinenepeki.

⁹Ino uluma okugeya mombepo yoye, oshoka ondjahi ohayi kala meni lyegoya.

¹⁰Ino tya: “Omasiku gonale oshike ga li omawanawa ge vule gongashingeyi?” Oshoka ito shi popi moondunge.

¹¹Owino ombwanawa ya fa uuthiga, oyo ekwatho lyaamboka ye na omwenyo.

¹²Oshoka owino oyo egameno, ngaashi iimaliwa oyo egameno, ihe ekwatho lyuunongo olyo ndika — owino otayi gamene omwenyo gwamwene gwayo.

¹³Tala iilonga yaKalunga, oshoka olye ta vulu okuutha shoka a shita sha goyoka?

¹⁴Nyanyukwa esiku ewanawa, nomesiku lyiiponga dhimbulukwa kutya Kalunga okwe li shiti ngaashika ndiyaka; omuntu ke shi shi shoka tashi mu adha konakuyiwa.

¹⁵Ayihe onde yi mono momasiku gandje gowala: oku na aayuuki mboka taa sile muuyuuki wawo noku na aakaanakalunga mboka taa kalele uukeenakalunga wawo olule.

¹⁶Ino ninga omuyuuki unene ngoye ino imonitha omunawino wa tsa pombanda — omolwashike wa hala okuhula po?

¹⁷Ino ninga omukeenakalunga unene noino ninga egoya — omolwashike to si po mbala esiku inaali thika?

¹⁸Osho opala okudhiginina shimwe nokwaagamuka ko koshikwawo, oshoka ngoka ha tila Kalunga, ota henuka ayihe mbika.

¹⁹Owino otayi koleke omunawino shi vule oofule omulongo ya kala moshilando.

²⁰Oshoka kombanda yevi kaku na omuyuuki ngoka ta longo uuwanawa auke ye ita yono.

²¹Ino pulakena oohapu adhihe aantu taa popi, opo waa uve omupiya gwoye te ku tuku.

²²Oshoka omwenyo gwoye mwene ogwa tseya kutya oho tuku ooyakweni.

²³Ayihe mbika onde yi konakona nowino. Onda popi nda ti: “Onda hala ndi ninge omunawino,” ihe osha kala ndje kokule.

²⁴Onkalo yowino oyi li kokule nomuule unene, olye ta vulu oku yi pikula?

²⁵Momwenyo gwandje onda tameke okukonakona nokutedhatedha nokukonga owino, opo ndi tseye kutya uukeenakalunga owo uugoya, nuugoya owo okwaanandunge.

²⁶Onda mono sha oshilulululu shi vule eso, omukiintu. Oye omwigo, omutima gwe etavu niikaha ye oonkandja. Omwaanawa koshipala shaKalunga ota manguluka miikaha ye, ihe omulunde ote mu kwata po.

²⁷Eeno, osho shoka nde shi dhimbulula, omuuvithi a ti, sho nda kambadhala okuyeleka oshinima noshikwawo, ndi mone ehuku.

²⁸Shoka nde shi kongakonga, ihe inandi shi mona, osho shika: Maantu eyuvi onda mono mo omulumentu gumwe omunashili, ihe inandi mona mo omukiintu omunashili nando ogumwe momwaalu tuu ngoka.

²⁹Tala, onda mono ashike kutya Kalunga okwa shiti aantu aayuuki, ihe yo yene ohayi ikongele iihelele oyindji.