Read Oshindonga-Ombiimbeli Ondjapuki 2008 Ecclesiastes 8 Bible Online

Ecclesiastes 8 - Oshindonga-Ombiimbeli Ondjapuki 2008 bible

Ecclesiastes 8

¹Olye a fa omunawino, nolye a tseya okufatula iinima? Owino yomuntu otayi adhimitha oshipala she, nuukukutu woshipala she tau lundululwa kuyo.

²Otandi ti: Vulika komalombwelo gomukwaniilwa, unene omolwegano we li ganene Kalunga.

³Za po koshipala shomukwaniilwa, ngoye ino kalela po oshinima shoka inaashi mu opalela, oshoka ashihe shoka a hala, ote shi gwanitha.

⁴Oshoka oohapu dhomukwaniilwa odhi na oonkondo, nolye ta vulu oku mu pula ta ti: “Oto ningi shike?”

⁵Nakudhiginina iipango ye ita adhika kuuwinayi; nomwenyo gwomunandunge otagu tseya ethimbo netokolo lyu uka.

⁶Oshoka oshinima kehe oshi na ethimbo lyasho neuthilo, nando uuwinayi womuntu otau mu thindile pohi.

⁷Omuntu ke na owino yaashoka tashi ke mu adha komeho, olye te mu hololele shoka tashi ya konakuyiwa?

⁸Kaku na omuntu ta vulu okupangela ombepo e yi keelele, kaku na ngoka e na oonkondo dhokuutha esiku lyeso nokaku na elaleko molugodhi; osho wo uukolokoshi itau hupitha ngoka te u ningi.

⁹Ayihe mbika onde yi dhimbulula, sho omwenyo gwandje gwa koneke oshilonga kehe tashi ningwa kohi yetango methimbo uuna omuntu gumwe ta dhiladhilile mukwawo oshiponga.

¹⁰Onda mono wo aakolokoshi taa fumvikwa taa yi mevululuko, manga mboka ye ende pauyuuki taa zi mehala eyapuki noya dhimbiwa moshilando. Naashika owalawala.

¹¹Uuna epangulo lyaalongi yuudhudhu itaali endelele okupangulwa, omwenyo gwaana yaantu ogwa fula okulonga uudhudhu.

¹²Omulunde nando na yone lwethele nota kala nomwenyo omule, ondi shi shi kutya mboka haa tila Kalunga oye li nawa, oshoka haye mu tila,

¹³ihe omulunde ita kala nawa noita lelepaleke omasiku ngaashi omuzizimba, oshoka iha tila Kalunga.

¹⁴Shoka hashi ningwa kombanda yevi, oshowala, owaleelela, aayuuki sho taa ningwa ngaashi aakaanakalunga, naakaanakalunga sho haa ningwa ngaashi aayuuki. Osho nda ti kutya owala, owaleelela.

¹⁵Opo mpoka nda tanga enyanyu, oshoka kohi yetango kaku na sha sho opalela omuntu, shila okulya nokunwa nokwiinyanyudha. Oyo mbika ta vulu okuninga momaipyakidhilo ge, manga e li kombanda yevi mokukalamwenyo nkoka Kalunga e ku mu pa kohi yetango.

¹⁶Sho nda pungulula omutima gwandje, ndi ilonge okutseya owino nokutala iinima mbyoka tayi ningwa kombanda yevi, eeno, nokuli omutenya nuusiku kaku na ngoka ta mono oomposi —

¹⁷onda mono miilonga ayihe yaKalunga kutya omuntu ita vulu okuuva ko shoka tashi ningwa kohi yetango; omuntu ni ipyakidhile okukonakona, ihe itu uvu ko sha. Nando omunawino a dhiladhile e yi uve ko, ita tompola sha.