Read Oshindonga-Ombiimbeli Ondjapuki 2008 Ecclesiastes 9 Bible Online

Ecclesiastes 9 - Oshindonga-Ombiimbeli Ondjapuki 2008 bible

Ecclesiastes 9

¹Ayihe mbika onde yi kwatele momutima gwandje, naayihe onde yi simonona, kutya aayuuki naanawino niilonga yawo oyi li miikaha yaKalunga, ohole nosho wo uutondwe omuntu ina tseya shoka tashi mu adha komeho.

²Ayihe oyi thike pamwe kwaayehe. Oshipewa shimwe ashike komuyuuki nokomukolokoshi, komwaanawa nokomwiinayi, komuyogoki nokomwiinyateki, kungoka ta yamba omayambo nokungoka itaa yamba omayambo; omwaanawa ke vulathane nomulunde, naangoka ta gana oha ningwa ngaashi ngoka a tila egano.

³Mwaayihe tayi ningwa kohi yetango, omu na oshiponga shika: ayehe oye na oshipewa shimwe noomwenyo dhaana yaantu odhu udha uuwinayi nomitima dhawo uugoya mokukalamwenyo kwawo akuhe; navulwa taa yi koonakusa!

⁴Onkene tuu ngoka e li mokati kaanamwenyo, oku na ngaa etegameno, oshoka ombwa yi na omwenyo oyi vule onime ya sa.

⁵Oshoka aanamwenyo otaa tseya kutya oye na okusa, ihe aasi itaa tseya sha nando, nokaa na we ondjambi yasha, oshoka ondhimbulukilo yawo otayi dhimbiwa.

⁶Ohole yawo, uutondwe wawo nuulaadhi wawo owa kana nale nokuli, nokaa na we sha mumbyoka tayi ningwa kohi yetango.

⁷Inda ano, lya oshikwiila shoye nenyanyu nou nwe omaviinu goye nomutima gwa tundulukwa, oshoka Kalunga okwa hokwa nale iilonga yoye.

⁸Tokitha aluhe oonguwo dhoye, nomugwayo inagu pumba ko komutse gwoye.

⁹Nyanyudha omwenyo gwoye namukadhoye, ngoka u mu holelele omasiku goye agehe ganathangwa ngoka Kalunga e ku pa kohi yetango — omasiku goye agehe ganathangwa, oshoka osho oshipewa shoye mokukalamwenyo nomiilonga yoye mbyoka to yi longo nuudhigu kohi yetango.

¹⁰Longa ashihe to vulu niikaha yoye, shi longa noonkondo dhoye, oshoka kaku na iilonga, ompangela, uunongo nenge owino moshaasi, moka noka ya mo.

¹¹Naishewe kohi yetango onda mono ko kutya esindano mokumatuka kali li aluhe mepangelo lyaamboka ye na ontuku, iita hayomapenda, oshikwiila hashaanawino, uuyamba hawaanandunge nolupundi halwoonkulungu, oshoka ethimbo neuthilo otali adha ayehe.

¹²Eeno, omuntu ina tseya ethimbo lye mwene ngashika oohi ndhoka dha yulwa monete yoshiponga nenge oondhila ndhoka hadhi yulwa moomwigo. Osho wo aana yaantu otaa yulwa methimbo lyoshiponga, nge taa gwile mo ohaluka.

¹³Naashika onde shi tala kohi yetango osho uunongo, nosha li oshinene momeho gandje:

¹⁴Okwa li okalando okashona naalumentu aashona ya li mo. Omukwaniilwa omunene okwe ka matukile, e ka kondeke e te ka tungile etuni lyokukondekela.

¹⁵Muko omwa li omulumentu ohepele, ihe omunawino; nguka okwa hupitha okalando nowino ye. Ihe kaku na we omuntu a dhimbulukwa omulumentu ngwiyaka ohepele.

¹⁶Nena onda ti: Owino oyi vule oonkondo dhoofule, ihe owino yohepele oya dhinika, noohapu dhe itadhi pulakenwa.

¹⁷Oohapu dhaanawino dha pulakenwa nengungumano, odhi vule omagandagulo gomukwaniilwa mokati komagoya.

¹⁸Owino oyi vule omatati golugodhi, ihe omulunde gumwe ota yono po uuwanawa owindji.