Read Oshindonga-Ombiimbeli Ondjapuki 2008 Leviticus 1 Bible Online

Leviticus 1 - Oshindonga-Ombiimbeli Ondjapuki 2008 bible

Leviticus 1

¹Omuwa okwa li metsalihangano e ti ithana Moses nokwe mu pe omautho ngaka

²Aaisraeli ye na oku ga gwanitha uuna taa yamba omafikilondjambo. Ngele oku na ngoka ta yamba oshimuna, na yambe ongombe nenge onzi nenge oshikombo.

³Nenge ota yamba ongombe ye efikilondjambo, na ete ongombe ondumentu yaa na oshipo. Ne yi ete posheelo shetsalihangano, opo Omuwa e yi taambe nohokwe.

⁴Na tenteke oshikaha she komutse gwayo, notayi taambwa yi ninge efikilondjambo lyokukutha po oondjo dhe.

⁵Ongombe ne yi tselele mpoka koshipala shOmuwa, naana yaAaron aayambi naa gandje ombinzi yayo kOmuwa e taye yi shashamine koombinga ne dhoshiyambelo shoka shi li posheelo shetsalihangano.

⁶Na yuye oshimuna e te shi tete iintimbu.

⁷Aayambi naa tule iikuni koshiyambelo e taye yi tomeke.

⁸Iintimbu naye yi tule momulilo pamwe nomutse noofu.

⁹Naa yoge iikwamela nomagulu momeya. Omuyambi na lungunithe iinima mbika ayihe koshiyambelo. Ndika olyo efikilondjambo li na ezimba lya nika nawa notali opalele Omuwa.

¹⁰Omuntu ngele ota yamba onzi nenge oshikombo, nashi kale oshilumentu shaa na oshipo.

¹¹Ne shi dhipagele kuumbangalantu woshiyambelo koshipala shOmuwa, naayambi naa shashamine oshiyambelo ashihe nombinzi yasho.

¹²Na tete onyama iintimbu, nomuyambi ne yi tule pamwe nomutse noofu dhasho piikuni mbyoka yi li momulilo koshiyambelo.

¹³Na yoge iikwamela momeya, omuyambi note yi pe Omuwa efikilondjambo e te yi lungunithile po ayihe koshiyambelo. Olyo efikilondjambo li na ezimba lya nika nawa notali opalele Omuwa.

¹⁴Ngele oku na omuntu ta yambele Omuwa efikilondjambo lyondhila, nali kale lyonguti nenge lyokangutyona.

¹⁵Omuyambi ne yi fale koshiyambelo e te yi thingonona othingo e ta lungunitha omutse gwayo koshiyambelo. Ombinzi yayo nayi ndondithilwe molumbumbu lwoshiyambelo.

¹⁶Ne yi kuthe oshikutunino nomalwenya e te yi umbile pelunda lyomutoko lwokuuzilo woshiyambelo.

¹⁷Ne yi tandule olumana, ewawa li kale kombinga kehe pwaa naa okuteta ewawa, noyi lungunithilwe ayihe kombanda yiikuni koshiyambelo. Olyo efikilondjambo li na ezimba lya nika nawa notali opalele Omuwa.