Read Oshindonga-Ombiimbeli Ondjapuki 2008 Leviticus 10 Bible Online

Leviticus 10 - Oshindonga-Ombiimbeli Ondjapuki 2008 bible

Leviticus 10

¹Aana yaAaron, Nadab naAbihu, shaa ngoka okwa kutha oshikangwa she e ta tula mo omakala ga geta ta gwedha mo iitsinino e te yi yambele Omuwa. Ihe omulilo nguka kagwa li omuyapuki, oshoka Omuwa ine ya lombwela ye gu yambe.

²Ohaluka Omuwa okwa tumu omulilo e tagu ya lungunitha po e taya sile koshipala shOmuwa.

³Moses okwa lombwele Aaron a ti: “Shika osha ningwa pahapu dhOmuwa, sho a tile: ‘Ayehe mboka taa longele ndje, oye na okusimaneka uuyapuki wandje; otandi talithile aantu yandje eadhimo lyandje.’ ” Ihe Aaron okwa kala a tya tuu thilu.

⁴Moses okwi ithana Mishael naElzafan, aana yaUssiel, hegona yaAaron, e ta ti kuyo: “Ileni mu kuthe po omidhimba dhaamwenigona metsalihangano, mu dhi fale kondje yontanda.”

⁵Oye ya e taye dhi kutha po dhi li moonguwo dhadho noku dhi fala kondje yontanda, ngaashi Moses a ti.

⁶Nena Moses okwa lombwele Aaron noyana Eleasar naItamar a ti: “Inamu shindalaleka omafufu geni nenge mu tuule oonguwo dheni, mu holole okulila kweni. Ngele tamu shi ningi, otamu si, Omuwa nota geele egongalo alihe. Ihe Aaisraeli ayehe ooyakweni oya zimininwa okulila oosa dhe etwa komulilo gwa tumwa kOmuwa.

⁷Inamu za mo mosheelo shetsalihangano, opo mwaa se, oshoka omwa yapulwa nomagadhi gOmuwa gokugwaya.” Oyo noya ningi, ngaashi ya lombwelwa kuMoses.

⁸Omuwa okwa lombwele Aaron e ta ti:

⁹“Inamu nwa omaviinu nomalovu omadhigu, ongoye mwene naamwoye, nge tamu yi metsalihangano. Ngele tamu shi ningi, otamu si. Ompango ndjika oyi na okudhigininwa koluvalo lweni aluhe sigo aluhe.

¹⁰Omu na okuyoolola pokati kaambyoka iiyapuki naambyoka inaayi yapuka, pokati kaambyoka ya yogoka naambyoka inaayi yogoka.

¹¹Omu na okunongeka Aaisraeli oompango adhihe ndhoka nde mu pethitha Moses.”

¹²Moses okwa lombwele Aaron noyana ya hupu ko, Eleasar naItamar, ta ti: “Kutheni ondjambo yiikulya ndjoka ya hupu koondjambo dha yambelwa Omuwa, yaa na efulika, ne mu yi lile ontega noshiyambelo, oshoka ondjapukilela.

¹³Yi lileni mehala eyapuki; oyo oshitopolwa sheni naamwoye shomiikulya ya yambelwa Omuwa. Shika osho shoka Omuwa a lombwele ndje.

¹⁴Ihe ngoye naamwoye aamati naakadhona otamu vulu okulya ondete yedhugadhugo noshilama sha gandjwa. Yi lileni mehala lya yogoka pamisindilo. Oyo oshitopolelwa sheni naamwoye sha zi mekwatathanondjambo lyAaisraeli.

¹⁵Oshilama sha gandjwa nondete yedhugadhugo nayi etwe pethimbo ndyoka oofu tadhi yambwa, opo yi dhugadhugwe koshipala shOmuwa. Oshitopolwa shika oshoye naamwoye aluhe sigo aluhe, ngaashi Omuwa a ti.”

¹⁶Moses okwa kala ta kongakonga oshikombo sheyonondjambo e ta koneke kutya nani osha lungunithwa po nale. Shika oshe mu geelitha Eleasar naItamar, aana yaAaron mboka ya hupu ko, e ta ti:

¹⁷“Omolwashike inaamu lila eyonondjambo mehala eyapuki? Olyo eyapukilela, nOmuwa okwe li gandja kune, opo mu dhime po oondjo dhegongalo.

¹⁸Talii ko, nani nombinzi inayi falwa metsalihangano, omwa li mu na oku li lila metsalihangano, ngaashi nde mu lombwelele.”

¹⁹Aaron okwa yamukula a ti: “Aantu nena oya yambele Omuwa eyonondjambo nefikilondjambo lyawo, ihe onda adhika kiinima yi thike mpa. Ando onda li nda lya eyonondjambo nena, oshinima shino ando osha ziminwa ngaa kOmuwa?”

²⁰Moses sho e shi uvu, okwa geyuluka.