Read Oshindonga-Ombiimbeli Ondjapuki 2008 Leviticus 14 Bible Online

Leviticus 14 - Oshindonga-Ombiimbeli Ondjapuki 2008 bible

Leviticus 14

²omautho ngaka geiyopaleko lyomunashilundu ngoka a aluka. Mesiku ndyoka e na okuuthwa omuyelele, ne etwe komuyambi.

³Omuyambi ne mu fale pondje yontanda e te mu konakona. Oshilundu ngele osha aluka,

⁴omuyambi ne etithe oondhila mbali hadhi liwa dhi na omwenyo, iiti yomusedeli, ongodhi ontiligane noshisopi.

⁵Omuyambi na dhipagithile ondhila yimwe kombanda yomeya omayelele ge li moshuma sheloya.

⁶Na kuthe ondhila onkwawo e te yi yaya mo pamwe niiti yomusedeli, ongodhi ontiligane noshisopi mombinzi yondhila ndjoka ya dhipagwa.

⁷Na shashamine ombinzi luheyali kunakwoopalekwa moshilundu note mu utha omuyelele. Ondhila ndjoka yi na omwenyo, ne yi ethe yi tuke yi ye nomalundu.

⁸Nakwoopalekwa na yoge oonguwo dhe, ni ikulule nawa omafufu agehe e ti iyogo momeya e ta ningi omuyelele. Ota vulu okuya montanda, ihe na kale omasiku gaheyali pondje yetsali lye.

⁹Mesiku etiheyali ni ikulule omutse, oombenzi niikulugumbo, eeno, ni ikulule omafufu agehe; na yoge oonguwo dhe e ti iyogo olutu aluhe nota kala omuyelele.

¹⁰Mesiku etihetatu ne ete oonzigona mbali oondumentu, onzigona onkiintu yomumvo gumwe yaa na oshipwe, omakopi gahamano guusila womunziya mwa pilulilwa omagadhi gooholivi noshititatu sholita shomagadhi gooholivi.

¹¹Omuyambi na fale nakwoopalekwa noondjambo ndhika kosheelo shetsalihangano.

¹²Nena omuyambi na kuthe onzigona ondumentu pamwe noshititatu sholita shomagadhi e te yi yamba yi ninge ondjondjambo; ne yi dhugadhuge koshipala shOmuwa.

¹³Na dhipagele onzigona mehala eyapuki moka hamu dhipagelwa iimuna yomayonondjambo nomafikilondjambo. Ota ningi ngeyi, oshoka ondjondjambo neyonondjambo ogomuyambi; ogo omayapukilela.

¹⁴Omuyambi na kuthe mombinzi yonzigona e te yi gogo koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.

¹⁵Omuyambi na kuthe omagadhi gamwe gooholivi moshititatu sholita e te ga tile peke lye mwene lyokolumoho

¹⁶e ta yaya mo omunwe gwomuuliko gwoshikaha shokolulyo e ta nagele omagadhi koshipala shOmuwa luheyali.

¹⁷Na kuthe momagadhi ngoka ge li peke lye e te ga tula pomahala ngoka a gogele ombinzi koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.

¹⁸Omagadhi ngoka taga hupu peke lye, omuyambi ne ga gwayeke momutse gwanakwoopalekwa. Pahedhi ndjika ota tsakanitha omisindilo dheopaleko koshipala shOmuwa.

¹⁹Nena omuyambi na yambe eyonondjambo e ta tsakanitha omusindilo gweopaleko. Konima yaambika na dhipage oshimuna shefikilondjambo,

²⁰e te shi yamba pamwe nondjambo yiikulya koshiyambelo. Pahedhi ndjika omuyambi ota tsakanitha omisindilo dheopaleko, nomuntu ota kala omuyelele.

²¹Omulumentu ngele ohepele ye ita vulu okugandja shi thike mpoka, ne etele eiyopaleko lye onzigona yimwe ondumentu, yi ninge ondjondjambo yi dhugadhugwe, opo a dhiminwe po. Ne ete ashike omakopi gaali guusila womunziya mwa pilulilwa omagadhi gooholivi, u ninge ondjambo yiikulya, noshititatu sholita shomagadhi gooholivi.

²²Ne ete wo oonguti mbali nenge uungutyona uyali, yimwe oyeyonondjambo nonkwawo efikilondjambo.

²³Mesiku etihetatu lyeiyopaleko lye ne yi ete komuyambi posheelo shetsalihangano.

²⁴Omuyambi na kuthe onzigona nomagadhi gooholivi e te ga yamba ondjambo yedhugadhugo koshipala shOmuwa.

²⁵Na dhipage onzigona e ta kutha mo ombinzi e te yi gogo koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.

²⁶Omuyambi na kuthe momagadhi e te ga tile peke lye mwene lyokolumoho,

²⁷e ta nagele gamwe nomunwe gwe gwomuuliko gwokolulyo koshipala shOmuwa luheyali.

²⁸Omagadhi gamwe ne ga tule pomahala ngoka a gogele ombinzi koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.

²⁹Omagadhi ngoka taga hupu po peke lye, omuyambi ne ga gwayeke momutse gwanakwoopalekwa. Pahedhi ndjika ota tsakanitha omisindilo dheopaleko koshipala shOmuwa.

³⁰Nena na yambe onguti yimwe yomoonguti nenge okangutyona kamwe komuungutyona

³¹u ninge eyonondjambo, nonkwawo yi ninge efikilondjambo pamwe nondjambo yiikulya. Pahedhi ndjika omuyambi ota tsakanitha omisindilo dheopaleko koshipala shOmuwa.

³²Ndjika oyo ompango yanakwaala oshilundu ngoka ita vulu okugandja oondjambo ndhoka dhu uthilwa eiyopaleko lye.

³³Omuwa okwa gandja omautho ngaka kuMoses naAaron.

³⁴Ngele tamu ka ya mevi lyaKaanan, ndyoka tandi li mu pe li ninge lyeni, e tandi eta oshushi mongulu yontumba mevi ndyoka,

³⁵mwene gwegumbo ndyoka na ka lombwele omuyambi kutya mongulu omwa fa mu na oshiponga shasha.

³⁶Omuyambi na uthe iinima ayihe yi tutilwe pondje, manga inaa konakona oshiponga, opo iinima ayihe kaaku tiwe oyi na oshidhila. Nena ota yi mongulu

³⁷e ta konakona oshiponga. Kekuma ngele okwa guguka ku na oondambo dha ziza kashona nenge dha nika uutiligane,

³⁸na ze mo mongulu e tayi edhilwa omasiku gaheyali.

³⁹Mesiku etiheyali na galuke e ta konakona ekuma ishewe. Ekwaulo ngele olya taandela,

⁴⁰na lombwele aantu ya kuthe mo mekuma oondhopi ndhoka dha kwaulwa nodhi falwe kehala lyoshidhila pondje yoshilando.

⁴¹Ekuma lyomeni nali kokolwe, neloya lya kokolwa ko, nali tutilwe kehala lyoshidhila pondje yoshilando.

⁴²Oondhopi oompe nadhi pingene ndhoka dha kuthwa mo, nomakuma naga kolongwe nomunoko omupe.

⁴³Oshushi nge tayi monika ishewe mongulu, konima yoondhopi sho dha pingakanithwa nekuma lya kokolwa nolya kolongwa,

⁴⁴omuyambi na ye ko a ka tale. Ngele oshushi oya taandela, ongulu oyoshidhila.

⁴⁵Nayi kumunwe po, oondhopi, omitenge nomunoko gwayo, ayihe nayi tutilwe kehala lyoshidhila.

⁴⁶Shaa ngoka ta yi mongulu, manga ya li ye edhilwa, ota kala e na oshidhila sigo ongulohi.

⁴⁷Shaa ngoka ta lala nenge ta li sha mongulu ndjoka, na yoge oonguwo dhe.

⁴⁸Omuyambi nge te ya a tale ongulu nota dhimbulula kutya oshushi inayi holoka we, ongulu sho ya kolongwa, ne yi uthe ondjelele. Oshushi oya za mo thiluthilu.

⁴⁹Mokwoopaleka egumbo omuyambi na kuthe oondhila mbali, iiti yomusedeli, ongodhi ontiligane noshisopi.

⁵⁰Na dhipagele ondhila yimwe kombanda yomeya omayelele ge li moshuma sheloya.

⁵¹Nena na kuthe iiti yomusedeli, oshisopi, ongodhi ontiligane nondhila yi na omwenyo e te yi yaya mombinzi yondhila ndjoka ya dhipagwa nomomeya omayelele. Na shashamine ongulu luheyali.

⁵²Pahedhi ndjika oto opaleke ongulu nombinzi yondhila, omeya omayelele, ondhila yi na omwenyo, iiti yomusedeli, oshisopi nongodhi ontiligane.

⁵³Nena na ethe ondhila ndjoka yi na omwenyo, yi tuke po yi ye pondje yoshilando momalundu. Pahedhi ndjika oto opaleke ongulu notayi kala ya yela.

⁵⁴Oompango ndhika odhuuvu woshilundu nuuvu woshipa,

⁵⁵dhoshushi yomoonguwo noyomoongulu,

⁵⁶dhuundhulumutu, okupya omuthithilalo nuutotono uutokele,

⁵⁷okunongela shoka sha yogoka naashoka shoshidhila. Ndjika ompango yuuvu woshilundu.