Read Oshindonga-Ombiimbeli Ondjapuki 2008 Leviticus 19 Bible Online

Leviticus 19 - Oshindonga-Ombiimbeli Ondjapuki 2008 bible

Leviticus 19

¹Omuwa okwa lombwele Moses a ti:

²“Lombwela egongalo alihe lyaIsrael to ti: ‘Kaleni aayapuki, oshoka ngame Omuwa Kalunga keni omuyapuki.

³Shaa ngoka na simaneke yina nahe ye na dhiginine Esabati lyandje, ngaashi nde mu uthile. Ongame Omuwa Kalunga keni.

⁴“ ‘Inamu etha ndje, ne mu ka longele iimenka. Inamu ihambulila iikalunga yiiyela noku yi simaneka. Ongame Omuwa Kalunga keni.

⁵“ ‘Ngele tamu yamba ekwatathanondjambo, dhiginineni omautho ngoka nde mu pa, ongame notandi li taamba.

⁶Onyama oyi na okuliwa uuna oshimuna sha dhipagwa, nenge esiku tali landula. Onyama kehe tayi hupile esiku etitatu, nayi lungunithwe po.

⁷Esiku etitatu oya nika oshidhila, nongele oku na ngoka te yi li, itandi ka taamba we eyambo ndyoka.

⁸Shaa ngoka te yi li, ota pewa ondjo, oshoka okwa shundula shoka oshiyapuki shOmuwa, nota ka dhimwa mo maantu yandje.

⁹“ ‘Uuna tamu teya omapya geni, inamu ga teya sigo okomunkulo, ne inamu ga pupula, nge mwa teya.

¹⁰Inamu shuna kiitsambe yeni yomiviinu, mu ka toonone ko omakukila, nenge mu toole po omandjembele ngoka ga gwila pevi. Ga thigileni po oohepele naakwiilongo. Ongame Omuwa Kalunga keni.

¹¹“ ‘Inamu yaka, inamu kotokela, inamu fundja.

¹²Inamu gana iifundja medhina lyandje, mu nyateke ngeyi edhina lyandje. Ongame Omuwa.

¹³“ ‘Inamu hepeka mukweni ne inamu mu yuga. Oondjambi dhaalongeli yeni inadhi kala pune sigo esiku lyangula.

¹⁴Inamu tuka ombolo ne inamu tulila omuposi epundukitho mondjila. Tileni ndje; ongame Omuwa Kalunga keni.

¹⁵“ ‘Inamu goyokitha oohapu moompangu. Inamu popila ohepele nenge mu game komuyamba; utheni eutho lyu uka.

¹⁶Omutotolombo tagu popi mukweni, inamu gu taandelitha, nongele gumwe e li mepupyu lyemakelo, popyeni shoka tasha ningi onzapo yoku mu popila. Ongame Omuwa.

¹⁷“ ‘Inamu tonda omumwanyoko koomwenyo dheni. Guneni mukweni nomwenyo gu uka, opo mwaa itsike ondjo omolwe.

¹⁸Mukweni inamu kala mu mu nine iikonene noku mu tonda, ihe holeni mukweni, ngaashi mu ihole ne yene. Ongame Omuwa.

¹⁹“ ‘Vulikeni komautho gandje. Inamu hambitha ontsezi yoshimuna sholudhi lulwe. Inamu kuna oombuto dhomaludhi gaali mumwe. Inamu zala oonguwo dha tungithwa oongodhi dhomaludhi gaali.

²⁰“ ‘Ngele omulumentu ta lala nomukadhona omupika ngoka a uvanekwa a ka ninge omukiintu gwomulumentu gulwe, ihe nani ine mu futa, na geelwe, ihe ina dhipagwa, oshoka oye omupika gwe.

²¹Omulumentu na ete onzi ondumentu kosheelo shetsalihangano, yi ninge ondjondjambo ye.

²²Omuyambi na tsakanithe nayo eopaleko lyokudhima po ondjo yomuntu ngoka, naKalunga ote mu dhimine po.

²³“ ‘Nge tamu ka ya mevi lyaKaanan e tamu tsike omiti dhi ili nodhi ili, iiyimati yadho yi taleni ya nika oshidhila omimvo ndatu dhopetameko. Methimbo ndyoka inamu yi lya tuu.

²⁴Momumvo omutine iiyimati ayihe nayi yoololelwe Omuwa, yi ninge ondjambo yoku mu hambelela.

²⁵Ihe momumvo omutitano otamu vulu okulya iiyimati mbyoka. Ngele otamu ningi ayihe mbika, omiti dheni otadhi ka ima iiyimati oyindji. Ongame Omuwa Kalunga keni.

²⁶“ ‘Onyama yi na ombinzi inamu yi lya nando. Inamu anekela ne inamu kala mu na uunganga.

²⁷Inamu ikulula omapalu, noombenzi dheni inamu dhi kulula omapalu.

²⁸Inamu ishata oonsha nenge mu kwegunyune omalutu geni mokulila oonakusa. Ongame Omuwa.

²⁹Inamu sitha aana yeni aakadhona ohoni, mu ya pitike okuninga oohonda dhomotempeli. Ngele tamu shi ningi, otamu longele iikalunga, nevi otali ka udha oluhondelo.

³⁰Dhiginineni Esabati ne mu simaneke ehala moka tandi longelwa. Ongame Omuwa.

³¹“ ‘Inamu ya kaantu mboka haa pula aathithi nokoompulile. Ngele tamu shi ningi, otamu ikwatitha oshidhila. Ongame Omuwa Kalunga keni.

³²“ ‘Simanekeni aakulupe, ne mu yele aakuluntu yoomvi. Tileni Kalunga keni. Ongame Omuwa.

³³“ ‘Inamu hepeka aakwiilongo mboka ya kala mevi lyeni.

³⁴Kaleni nayo, ngaashi mu li nOmuisraeli omukweni. Kaleni mu ya hole, ngaashi mu ihole ne yene. Dhimbulukweni kutya ne omwa li aakwiilongo muEgipiti. Ongame Omuwa Kalunga keni.

³⁵“ ‘Inamu kotokela shaa ngoka mokulongitha iiyelekitho yiifundja yuule, yuudhigu nenge yiipindomwa.

³⁶Kaleni mu na oshiviha shi shi kwiinekelwa, oomasandjundo dhi shi kwiinekelwa niipindithomwa yi shi kwiinekelwa. Ongame Omuwa Kalunga keni nde mu tembudha muEgipiti.

³⁷Vulikeni koompango nokomautho gandje agehe. Ongame Omuwa.’ ”