Read Oshindonga-Ombiimbeli Ondjapuki 2008 Leviticus 2 Bible Online

Leviticus 2 - Oshindonga-Ombiimbeli Ondjapuki 2008 bible

Leviticus 2

¹Ngele oku na omuntu ta yambele Omuwa ondjambo yiikulya, na ete uusila womunziya. Ne u nothele omagadhi gooholivi nokugwedha po iitsinino.

²Ne u pe aana yaAaron aayambi. Omuyambi na kuthe mondjambo ombinga yokuyambelwa koshiyambelo, eke limwe lyuusila u na omagadhi niitsinino ayihe, e te yi lungunithile koshiyambelo. Olyo efikilondjambo li na ezimba lya nika nawa notali opalele Omuwa.

³Oshihupe shondjambo yiikulya otashi ningi shaAaron noyana; osho oshiyapukilela, oshoka osha za kondjambo yiikulya ya yambelwa Omuwa.

⁴Ngele oto yambele Omuwa ondjambo yiikulya ya pya peziko, nayi kale oshikwiila sha mbumbwakana inaashi tulwa efulika, sha ningwa nuusila womunziya, sha tulwa omagadhi gooholivi, nenge yi kale okakwiila ka pepuka ka gwayekwa omagadhi gooholivi.

⁵Ngele oto yamba oshikwiila sha pya poshikangwa, nashi kale shuusila womunziya mwa tulwa omagadhi gooholivi, ihe ino tula mo efulika.

⁶Shi nyanyagula e to tile ko omagadhi, uuna to shi yamba, shi ninge ondjambo yiikulya.

⁷Ondjambo yiikulya ngele oya pya mombiga, nayi kale yuusila womunziya nomagadhi gooholivi.

⁸Etela Omuwa ondjambo yiikulya ya longekidhwa ngeyi; yi gandja komuyambi, ngoka te yi fala koshiyambelo.

⁹Omuyambi na kuthe mondjambo ombinga yokuyambelwa koshiyambelo e te yi lungunithile koshiyambelo. Oyo efikilondjambo li na ezimba lya nika nawa notali opalele Omuwa.

¹⁰Shoka tashi hupu kondjambo yiikulya, oshaayambi; osho oshiyapukilela, oshoka osha za mondjambo yiikulya ya yambelwa Omuwa.

¹¹Oondjambo dhiikulya ndhoka to yambele Omuwa, ino tula mo efulika; ino longitha efulika nenge omagadhi goonyushi moondjambo dhiikulya tadhi yambelwa Omuwa.

¹²Iinima mbika otayi vulu okweetelwa Omuwa moondjambo dhoshipe, ihe inayi lungunithilwa koshiyambelo.

¹³Toya ondjambo kehe yiikulya nomongwa, oshoka omongwa otagu kalele po ehangano pokati keni naKalunga. (Ou na okutoya oondjambo dhoye adhihe nomongwa.)

¹⁴Uuna to etele Omuwa ondjambo yoshipe shiilya, yamba omaha ga yaywa nenge iilya ya hompwa.

¹⁵Yi nothela omagadhi gooholivi nokugwedha po iitsinino.

¹⁶Omuyambi na lungunithe po ombinga ndjoka yoomuma nomagadhi yi na okuyambelwa koshiyambelo niitsinino ayihe, yi ninge ondjambo yiikulya ya yambelwa Omuwa.