Read Oshindonga-Ombiimbeli Ondjapuki 2008 Leviticus 21 Bible Online

Leviticus 21 - Oshindonga-Ombiimbeli Ondjapuki 2008 bible

Leviticus 21

¹Omuwa okwa lombwele Moses a lombwele aana yaAaron aayambi a tye: “Hamuyambi ti inyateke tuu nande, a ye komafumviko goonakusa,

²kakele kayina, he, omwanamati, omwanakadhona, omumwayina omulumentu

³nenge omumwayina omukiintu inaa hokanwa a kala maandjawo.

⁴Ini ikwatitha oshidhila peso lyomukwezimo.

⁵“Kape na omuyambi ti ikulula epalu nenge a kulule oombenzi dhe epalu nenge i ishatithe molutu.

⁶Na kale omuyapuki noina sitha edhina lyandje ohoni. Oha yambele ndje oondjambo dhiikulya, noku na okukala omuyapuki.

⁷Omuyambi ke na okuhokana omukiintu ohonda nenge omukiintu kee shi omukadhonalela nenge omukulukadhi a hengwa; omuyambi oye omuyapuki.

⁸Aantu naa tale omuyambi kutya omuyapuki, oshoka ota yambele ndje oondjambo dhiikulya. Ongame Omuwa, ngame omuyapuki notandi yapula aantu yandje.

⁹Ngele ope na omuna gwomuyambi omukiintu ta ningi ohonda, ota sitha he ohoni; na fikwe po a se.

¹⁰“Omuyambimukuluntu, ngoka a tilwa omagadhi gokugwaya komutse nokwa yapulilwa okuzala oonguwo dhuuyambi, ina etha nando omafufu ge ga shindalale nenge a tuule oonguwo dhe mokulila oosa.

¹¹Ina hedha komudhimba, nando nagu kale ogwahe nenge gwayina, ini ikwatitha oshidhila.

¹²Ina pita mo metsalihangano a ye komudhimba, opo kaa nyateke etsali eyapuki lyaKalunga ke, oshoka eyapulo lyomagadhi gokugwaya gaKalunga ke oli li kuye. Ongame Omuwa.

¹³Na hokane omukadhonalela,

¹⁴hamuselekadhi nenge omukulukadhi a hengwa nenge omukiintu ohonda. Na hokane ashike omukadhonalela gwomoludhi lwe mwene,

¹⁵opo kaa nikithe oluvalo lwe oshidhila. Ongame Omuwa nonde mu yoolola a ninge omuyambimukuluntu.”

¹⁶Omuwa okwa lombwele Moses ta ti:

¹⁷“Lombwela Aaron to ti: ‘Kape na gumwe gwomoluvalo lwoye ngoka e na oshipo molutu lwe, ta vulu okuyambela ndje oondjambo dhiikulya. Shika otashi kala aluhe sigo aluhe.

¹⁸Kape na omuntu e na oshipo ta yamba oondjambo, ngele omuposi, oshilema, e na oshipo moshipala nenge molutu,

¹⁹Oshintimbukugulu nenge oshintimbukaha,

²⁰omuntu a tya okankundundu nenge eyungu, e na omeho goongala, olwaga, oshilundu nenge omatupa ge ga mona oshiponga.

²¹Kape na omuntu gwomoluvalo lwaAaron ta ningi omuyambi ngoka e na oshipo molutu, a yambele ndje oondjambo dhiikulya.

²²Omuntu a tya ngaaka ota vulu ngaa okulya iikulya ayihe ya yambelwa ndje, oondjambo dhiikulya oondjapuki noondjambo oondjapukilela.

²³Ihe oshoka e na oshipo molutu lwe, ina hedha ketopolitho eyapuki nenge koshiyambelo. Oye kee na okushundula iinima yandje iiyapuki, oshoka ongame Omuwa, ongame tandi yi yapula.’ ”

²⁴Moses okwe shi lombwele Aaron noyana nosho wo Aaisraeli ayehe.