Read Oshindonga-Ombiimbeli Ondjapuki 2008 Leviticus 22 Bible Online

Leviticus 22 - Oshindonga-Ombiimbeli Ondjapuki 2008 bible

Leviticus 22

¹Omuwa okwa lombwele Moses

²a lombwele Aaron noyana ta ti: “Kwateni nesimaneko oondjambo oondjapuki ndhoka Aaisraeli taa yoololele ndje, opo mwaa sithe edhina lyandje eyapuki ohoni. Ongame Omuwa.

³Ngele ope na ngoka gwomoluvalo lweni a nyata, ihe ota hedha koondjambo ndhoka Aaisraeli ye dhi yoololele ndje, na dhimwe po koshipala shandje. Shika otashi kala aluhe sigo aluhe.

⁴“Kape na ngoka gwomoluvalo lwaAaron e na oshilundu nenge ehiho lyomayoyo muulumentu, ta li oondjambo oondjapuki sigo aluhe. Omuyambi kehe ota kwata oshidhila, ngele ta gumu sha sha nyatekwa komudhimba nenge ta zi omasita goluvalo

⁵nenge ta gumu oshinamwenyo sha nyata nenge omuntu a nyata.

⁶Omuyambi kehe ngoka ta kala a nika oshidhila, ota kala nasho sigo ongulohi, nongele osho e li ngeyi, ina lya nando oondjambo oondjapuki, sigo i iyogo olutu aluhe.

⁷Etango nge lya ningine, ota kala a yela nota vulu ihe okulya oondjambo oondjapuki, ndhoka iikulya ye.

⁸Ina lya onyama yoshinamwenyo shi isila nenge sha lika kiilikama; otayi mu kwatitha oshidhila. Ongame Omuwa.

⁹“Aayambi ayehe oye na okudhiginina omautho ngoka nda gandja. Ngele itaye ga dhiginine ya vulike komautho omayapuki, otaa si. Ongame Omuwa, ongame tandi ya yapula.

¹⁰“Aayambi ayeke taa li oondjambo oondjapuki, hagulwe, nando oku li megumbo lyomuyambi nenge he mu longele.

¹¹Ihe aapika yomuyambi mboka a landa niimaliwa ye mwene nenge ya valelwa maandjawo, otaa vulu okulya iikulya yomiikulya ye.

¹²Omuna omukadhona gwomuyambi ta hokanwa komulumentu kee shi omuyambi, ina lya oondjambo oondjapuki.

¹³Ihe omwana omuselekadhi nenge a hengwa, ndele ke na aanona, ngele okwa shuna a kale megumbo lyahe ngaashi muugundjuka we, ota vulu oku dhi lya. Oluvalo aluke lwomuyambi otalu vulu oku dhi lya.

¹⁴“Ngele omuntu gulwe ta li sha mondjambo ondjapuki mokwaashiwo, na fute omuyambi ondjele ya gwedhwa oshititano.

¹⁵Aayambi kaye na okushundula oondjambo oondjapuki,

¹⁶ye ethe omuntu gulwe e dhi lye; shika otashi eta ondjo negeelo komuntu ngoka. Ongame Omuwa, ongame tandi dhi yapula.”

¹⁷Omuwa okwa lombwele Moses

¹⁸a pe Aaron noyana nAaisraeli ayehe omautho ngaka. Omuisraeli nenge omukwiilongo e li muIsrael ngoka te eta efikilondjambo, ongele okugwanitha euvaneko nenge ta yamba pahalo lye mwene,

¹⁹ne ete oshimuna oshilumentu shaa na oshipo, opo shi taambwe.

²⁰Ngele otamu yamba oshimuna shi na oshipo, Omuwa ite shi taamba.

²¹Ngele oku na ngoka te etele Omuwa ekwatathanondjambo, ongele okugwanitha euvaneko nenge ta yamba pahalo lye mwene, oshimuna nashi kale shaa na oshipo, ngele tashi taambwa.

²²Inamu yambela Omuwa oshimuna oshiposi nenge oshilema nenge shi na oshilalo nenge oshitumba, oluthingwe nenge olwaga. Iimuna ya tya ngaaka inamu yi yambela koshiyambelo, yi ninge oondjambo dhiikulya.

²³Oshimuna shoka inaashi shitika nenge oshilema oto vulu ngaa okuyamba pahalo lyoye mwene, ihe kashi shi kutaambwa megwanitho lyeuvaneko.

²⁴Inamu yambela Omuwa oshimuna shoka shi na omatupa ga thengenyenwa, sha tetwa, sha nyankagulwa nenge sha tuulwa omatupa. Shika inashi ziminwa mevi lyeni.

²⁵“Inamu yamba oshimuna mwe shi landa komukwiilongo. Iimuna ya tya ngaaka otayi talwa yi na oshipo noitayi taambwa.”

²⁶Omuwa okwa lombwele Moses a ti:

²⁷“Okatana nenge okanzona nenge okakombwena ngele ka valwa, naka kale puyina omasiku gaheyali, ihe mesiku etihetatu otaka vulu okuyambwa notaka opalele Omuwa.

²⁸Ongombe ino yi yambela pamwe nokatana kayo, osho wo onzi nokanzona kayo nenge oshikombo nokakombwena kasho mesiku limwe.

²⁹Uuna tamu yamba epandulondjambo kOmuwa, landuleni omautho, opo li taambwe;

³⁰li lyii po esiku ndyoka ne mwaa hupithile sha esiku lyangula.

³¹“Vulikeni kiipango yandje ne mu yi landule. Ongame Omuwa.

³²Inamu nyateka edhina lyandje eyapuki. Aaisraeli ayehe oye na okutseya kutya ngame omuyapuki. Ongame Omuwa, ongame tandi mu yapula,

³³nonde mu tembudha muEgipiti, ndi ninge Kalunga keni. Ongame Omuwa.”