Read Oshindonga-Ombiimbeli Ondjapuki 2008 Leviticus 23 Bible Online

Leviticus 23 - Oshindonga-Ombiimbeli Ondjapuki 2008 bible

Leviticus 23

¹Omuwa okwa pe Moses

²omautho taga landula gomatango omanene, uuna Aaisraeli taa gongala melongelokalunga.

³Iilonga nayi longwe momasiku gahamano, ihe esiku etiheyali olyo Esabati, esiku lyevululuko. Esiku ndyoka inamu longa iilonga, ihe gongaleni melongelokalunga. Esabati olyOmuwa, shaa mpoka mwa kala.

⁴Ngaka ogo omasiku gomatango omanene gOmuwa mu na oku ga tseyitha pomathimbo gago.

⁵Opaasa yokusimaneka Omuwa otayi tameke peningino lyetango mesiku etimulongo netine lyomwedhi gwotango.

⁶Mesiku etimulongo netitano lyomwedhi ngoka Oshituthi shiikwiila inaayi tulwa efulika otashi tameke, nomomasiku gaheyali inamu lya iikwiila ya tulwa efulika.

⁷Mesiku lyotango lyomomasiku ngaka gongaleni kelongelokalunga nokape na omuntu ta longo sha.

⁸Yambeni oondjambo dhiikulya kOmuwa momasiku gaheyali. Mesiku etiheyali gongaleni ishewe kelongelokalunga, ihe inamu longa sha.

⁹Omuwa okwa popi naMoses a ti:

¹⁰“Lombwela Aaisraeli u tye: ‘Ngele mwa thiki mevi ndyoka tandi li mu pe, e tamu teya iilya yamo, ondudhi yotango yiilya yoshipe sheni yi eteni komuyambi.

¹¹Ote yi dhugadhuga koshipala shOmuwa, opo mu opalele Omuwa. Omuyambi ote yi dhugadhuga mesiku lya landula Esabati.

¹²Esiku ndyoka ondjambo yeni yiilya tayi dhugwadhugwa, yambeni onzigona ondumentu yomumvo gumwe yaa na oshipo, yi ninge efikilondjambo kOmuwa.

¹³Pamwe nayo gandjeni omakopi gane guusila womunziya mwa tulwa omagadhi gooholivi, u ninge ondjambo yiikulya yi na ezimba lya nika nawa lyo opalela Omuwa. Yambeni wo oshinuwandjambo sholita yimwe yomaviinu.

¹⁴Iilya iipe inamu yi lya iiyihu nenge ya kangwa nenge oshikwiila shayo sha yothwa, sigo mwa yamba tango ondjambo ndjika kuKalunga. Eutho ndika oli na okulandulwa komaluvalo geni agehe aluhe sigo aluhe.’ ”

¹⁵“ ‘Yaluleni iiwike yu udha iheyali okuza kesiku lya landula Esabati, uuna ndoka mwe eta ondudhi yiilya mu yi yambele Omuwa.

¹⁶Mesiku etimilongontano, esiku lya landula Esabati etiheyali, otamu yambele Omuwa ondjambo yiilya iipe.

¹⁷Egumbo kehe nali ete iikwiila iyali yokudhugadhugwa. Iikwiila mbika nayi ningwe momakopi gane guusila womunziya mwa tulwa efulika notayi pewa Omuwa yi ninge ondjambo yiilya yotango opo yi teywe.

¹⁸Pamwe noshikwiila egongalo nali yambe oonzigona heyali dhomumvo gumwe, ongombe yimwe ondumentu yomutanda niikombo iyali; ayihe nayi kale yaa na oshipo. Nayi ninge efikilondjambo kOmuwa pamwe nondjambo yiikulya noshinuwandjambo. Ondjambo ndjika oyi na ezimba lya nika nawa tali opalele Omuwa.

¹⁹Yambeni eyonondjambo lyoshikombo oshilumentu nekwatathanondjambo lyoonzigona mbali oondumentu dhomumvo gumwe.

²⁰Omuyambi na dhugadhuge oshikwiila shoshipe noonzigona mbali oondumentu koshipala shOmuwa. Oondjambo ndhika oondjapuki dhOmuwa otadhi ningi dhaayambi.

²¹Esiku ndyoka inamu longa, ihe gongaleni kelongelokalunga. Omaluvalo geni naga landule omautho ngaka aluhe sigo aluhe.

²²“ ‘Uuna tamu teya omapya geni, inamu ga teya sigo okomunkulo, ne inamu ga pupula, nge mwe ga teya; ga thigilii po oohepele naakwiilongo. Ongame Omuwa Kalunga keni.’ ”

²³Omuwa okwa lombwele Moses a ti:

²⁴“Lombwela Aaisraeli to ti: ‘Esiku lyotango lyomwedhi omutiheyali li ningeni esiku lyevululuko, esiku lyedhimbuluko lyokuhika omankuma tamu gongala kelongelokalunga.

²⁵Inamu longa sha esiku ndyoka. Yambeleni Omuwa ondjambo yiikulya.’ ”

²⁶Omuwa okwa lombwele Moses e ta ti:

²⁷“Esiku etimulongo lyomwedhi omutiheyali olyo esiku lyegeyulukitho. Nena ningeni oshigongi oshiyapuki, idhilikeni iikulya nokweetela Omuwa ondjambo.

²⁸Inamu longa nando osha mesiku ndyoka, oshoka olyo esiku lyegeyulukitho lyokukutha po oondjo dheni koshipala shOmuwa.

²⁹Shaa ngoka iti idhilike iikulya esiku ndyoka, ota dhimwa mo maantu yaKalunga.

³⁰Naangoka ta longo sha esiku ndyoka, Omuwa oye mwene te mu dhipaga.

³¹Eutho ndika nali dhigininwe sigo aluhe komaluvalo geni shaa mpoka ge li.

³²Okuza keningino lyetango mesiku etimugoyi sigo okeningino lyetango lyesiku etimulongo taleni esiku ndika lyevululuko nolyeidhiliko lyiikulya.”

³³Omuwa okwa lombwele Moses a ti:

³⁴Lombwela Aaisraeli u tye Mesiku etimulongo netitano lyomwedhi omutiheyali oku na oshituthi shomatsali giihwa iitalala shomasiku gaheyali.

³⁵Mesiku lyotango lyomomasiku ngaka gongaleni kelongelokalunga ne inamu longa sha.

³⁶Esiku kehe lyomomasiku gaheyali yambeni ondjambo yiikulya. Mesiku etihetatu gongaleni okuhulitha oshituthi e tamu yamba ondjambo yiikulya. Osho oshigongi oshiyapuki, inamu longa sha.

³⁷(Ngaka ogo omatango omanene moka tamu gongala okusimaneka Omuwa e tamu yamba oondjambo: omafikilondjambo, oondjambo dhiikulya, oontselelandjambo niinuwandjambo, ngaashi tadhi pumbiwa esiku nesiku.

³⁸Omatango ngaka omanene oga gwedhwa kOmasabati goshito, noondjambo ndhika otadhi gwedhelwa koondjambo dheni dhoshito, oondjambo dhegwanitho lyomauvaneko noondjambo dhopahalo lyeni ndhoka tamu pe Omuwa.)

³⁹“ ‘Uuna mwa teya omapya geni, dhaneni oshituthi shika omasiku gaheyali tashi tameke mesiku etimulongo netitano lyomwedhi omutiheyali. Esiku lyotango olyo esiku lyevululuko lya sheywa, nesiku etihetatu osho wo.

⁴⁰Mesiku lyotango toononeni iiyimati iiwanawa komiti dheni, kutheni iiyale yomilunga niitayi yomiti dha hapa e tamu tameke okudhana oshituthi tamu simaneke Omuwa Kalunga keni.

⁴¹Shi dhaneni omasiku gaheyali. Eutho ndika nali dhigininwe koluvalo lweni aluhe sigo aluhe.

⁴²Aaisraeli ayehe naa kale momatsali omasiku gaheyali,

⁴³opo oluvalo lweni lu tseye kutya Omuwa okwa kaleke aantu ye momatsali, sho a li te ya enditha moku ya tembudha muEgipiti. Ongame Omuwa Kalunga keni.’ ”

⁴⁴Moses okwa pe Aaisraeli omautho gomatango ngaka omanene gokusimaneka Omuwa.