Read Oshindonga-Ombiimbeli Ondjapuki 2008 Leviticus 25 Bible Online

Leviticus 25 - Oshindonga-Ombiimbeli Ondjapuki 2008 bible

Leviticus 25

¹Omuwa okwa popi naMoses kondundu Sinai,

²a gandje kAaisraeli omautho taga landula. Uuna tamu ka thika mevi ndyoka mwe li pewa kOmuwa, evi nali ningile Omuwa Esabati momumvo omutiheyali.

³Momimvo hamano kuneni omapya geni, nomomimvo hamano opalekeni iitsambe yeni yomiviinu ne mu likole iiyetwamo yayo.

⁴Ihe omumvo omutiheyali ogwo omumvo gwevululuko lyevi, omumvo gwa yapulilwa Omuwa. Inamu kuna omapya geni ne inamu opaleka iitsambe yeni yomiviinu.

⁵Iilya mbyoka yi imenitha, inamu yi teya ne inamu likola omahila gomiviinu inaadhi opalekwa. Nguka ogwo omumvo gwevululuko lyevi.

⁶Evi nali kale inaali longwa momumvo ngoka, otali mene iilya yoye noyaapika yoye, aalongeli yoye naakwiilongo ya kala mokati keni,

⁷iimuna yoye niiyamakuti momalundu geni. Ashihe shoka tashi mene mo, iipalutha yayo.

⁸Yaluleni omimvo heyali lwomimvo heyali, opo omimvo dhi ninge omilongo ne nomugoyi.

⁹Nena mesiku etimulongo lyomwedhi omutiheyali hikitheni enkuma; mesiku lyegeyulukitho enkuma nali hikwe mevi alihe.

¹⁰Yoololeni omumvo omutimilongontano e tamu igidha emanguluko lyaakalimo ayehe mevi. Omumvo nguka nagu kale omumvo gweligolo. Omaliko agehe ngoka ga landwa, naga shune kooyene nenge koyana, naangoka a landwa omupika, na shune koyaandjawo.

¹¹Inamu kuna omapya geni nenge mu teye iilya yi imenitha yo yene e tayi koko nenge mu likole omandjembele momiviinu dheni inaadhi opalekwa.

¹²Omumvo aguhe otagu mu ningile omuyapuki; otamu li owala iilya mbyoka yi imenitha yo yene.

¹³Momumvo nguka omaliko ngoka ga landwa, oge na okushuna kooyene yonale.

¹⁴Uuna tamu landitha po omapya kAaisraeli ooyakweni nenge tamu ga landa kuyo, inamu thindilathana kongundhi.

¹⁵Ondando nayi yelekwe nomimvo ndhoka epya tali vulu okugandja iilya sigo okomumvo gweligolo.

¹⁶Ngele oku na omimvo odhindji, ondando otayi londo, ihe ngele oku na owala omimvo omishona, ondando otayi kuluka, oshoka shoka tashi landithwa po, iilya mbyoka tayi ka mena mepya moka.

¹⁷Ino kotokela mukweni, tila Kalunga koye; oshoka oye Omuwa Kalunga koye.

¹⁸Vulikeni koompango dhOmuwa adhihe nokomautho ge agehe, opo mu kale mu na ombili moshilongo.

¹⁹Evi otali menitha iilya, notamu ka mona iikulya ya gwana po e tamu kala mu na ombili.

²⁰Ihe otashi vulika tamu pula tamu ti: “Oshike tashi ka liwa momumvo omutiheyali, omapya sho inaaga kunwa ko kwaa na eteyo?”

²¹Omuwa ota yambeke evi momumvo omutihamano, li menithe iikulya ya gwana omimvo ndatu.

²²Sho tamu kunu omapya geni momumvo omutihetatu, otamu ka lya natango shoka mwa kunine momumvo omutihamano; otamu ka kala mu na iikulya ya gwana sigo tamu teya iilya momumvo omutimugoyi.

²³Omapya inaga landithwa po sigo aluhe, oshoka evi kali shi lyoye, olyaKalunga. Ngoye omukwiilongo ngoka a zimininwa oku li longitha.

²⁴Uuna epya tali landithwa po, uuthemba woshito wamwene gwalyo nau dhimbulukiwe.

²⁵Omuisraeli ngele ta shunduka a ninge ohepele e tashi mu thiminike a landithe po epya lye, omunezimo gwe gwomekota ne ke li landulule ko.

²⁶Omuntu ngoka kee na omunezimo gwomekota gwoku li landulula ko, ngele ota ningi omuyamba, e ke li landulule ko ye mwene,

²⁷na yalule omimvo ndhoka dha piti okuza kelandithopo lye, opo a fute omuntu ngoka e li landa iisimpo mbyoka tayi gwana sigo okomumvo gweligolo tagu ya. Nena ote li mono ishewe.

²⁸Ihe ngele ke na iimaliwa e li landulule ko, epya otali kala miikaha yaangoka e li landa sigo okomumvo gweligolo. Momumvo ngoka otali shuna kumwene gwalyo.

²⁹Ngele oku na omuntu ta landitha po egumbo li li moshilandohote, oku na uuthemba e ke li landulule ko omumvo gwotango gu udha okuza kesiku ndyoka lya landithwa po.

³⁰Ihe ngele ite li landulula ko momumvo ngoka, ota kanitha uuthemba woku li monununa. Egumbo otali ningi eliko lyanakulanda noluvalo lwe; itali ka galuka we omumvo gweligolo.

³¹Ihe omagumbo ngoka ge li momikunda, naga ningwe ngaashi omapya; mwene e na uuthemba woku ga landulula notaga shuna omumvo gweligolo.

³²Ihe Aalevi naa kale ye na uuthemba waaluhe wokulandulula omagumbo miilando mbyoka ye yi pewa.

³³Ngele egumbo otali landithwa kOmulevi lyo inali landululwa we, nali shune momumvo gweligolo, oshoka omagumbo miilando yAalevi ogo eliko lyawo yene mokati kAaisraeli.

³⁴Ihe omaunapelo ga kunduka iilando yAalevi, inaga landithwa po; ogo eliko lyawo aluhe.

³⁵Ngele omushiinda gwoye Omuisraeli omukweni ta ningi ohepele ye ita vulu okwiikwatha, ou na oku mu kwatha ngaashi wo omukwiilongo nenge omuntu a kala maandjeni.

³⁶Ino mu pula ontanitho, ihe tila Kalunga nou kaleke omukweni pungoye.

³⁷Miimaliwa mbyoka te ku hehela, ino mu pula ontanitho nenge elikolo kiikulya mbyoka we yi mu landitha.

³⁸Oshipango shika oshOmuwa Kalunga keni, ngoka e mu tembudha muEgipiti, opo e mu pe evi lyaKaanan ye a ninge Kalunga keni.

³⁹Ngele Omuisraeli omukweni a kala pungoye ta hepa noti ilanditha po kungoye, a ninge omupika, ino mu longitha papika.

⁴⁰Na kale pungoye omulongeli gwoye note ku longele sigo okomumvo gweligolo.

⁴¹Nena nge gwa thiki, ota manguluka pamwe noyana e ta shuna kaandjawo keliko lyoohekulu.

⁴²Aaisraeli oyo aapika yOmuwa, ngoka e ya tembudha muEgipiti, itaa landithwa po aapika.

⁴³Ino ya pangela nonyanya, ihe tila Kalunga.

⁴⁴Ngele owa pumbwa omupika, mu landa kiigwana yopuushiinda woye.

⁴⁵Otamu vulu wo okulanda aana yaakwiilongo mboka ya kala mokati keni. Aanona mboka ya valelwa mevi lyeni, otaa vulu ya ninge yeni,

⁴⁶notamu vulu oku ya thigila aana yeni ya ninge eliko lyawo noku ya longela mokukalamwenyo kwawo akuhe. Ihe Omuisraeli ino mu pangela nonyanya.

⁴⁷Omukwiilongo a kala mokati keni ngele ta yambapala, manga Omuisraeli omukweni ta thigonapala e ti ilanditha po, a ninge omupika komukwiilongo nenge komuntu gwaandjawo,

⁴⁸Omuisraeli oku na uuthemba wokumangululwa. Gumwe gwomaamwayina

⁴⁹nenge hekulu nenge gwaantsezi ye nenge omunezimo gulwe gwomekota ota vulu oku mu mangulula a shune; nenge ngele okwi iyadha ye mwene, ota vulu okwiikulila ko.

⁵⁰Na pule omayele komulandi gwe, oyo notaa yalula omimvo okuza kethimbo, uuna i ilanditha po sigo okomumvo gweligolo, e ta yeleke iikulila pandjele yondjambi yokufuta omuntu gwomiilonga.

⁵¹Na fute oshitopolwa shoka shondando ye shi thike pomwaalu gwomimvo ndhoka dha thigala ko okwaadha omumvo gweligolo.

⁵²

⁵³Iikulila nayi yalulwe pandjele ndjoka omuntu ta longele ondjambi. Ihe mwene gwe na kale itee mu pangele nonyanya.

⁵⁴Ngele ita mangululwa pamukalo nguka, na ka mangululwe pamwe noyana momumvo gweligolo tagu ya.

⁵⁵Omuisraeli ita vulu okukala omupika aluhe, oshoka Aaisraeli oyo aapika yOmuwa. Okwe ya tembudha muEgipiti. Oye Omuwa Kalunga kawo.